ٹی پی سی سی کے نئے صدر کا انتخاب ہائی کمان کرے گی

حیدرآباد: چیف منسٹر ریونت ریڈی نے کہا کہ ٹی پی سی سی کے نئے صدر کا انتخاب اور کابینہ میں توسیع کے سلسلے میں گیند اب اے آئی سی سی کے کورٹ میں ہے۔

انہوں نے کہا کہ اے آئی سی سی کو بتانا چاہئے کہ ان دو معاملات میں تاخیر کیوں ہو رہی ہے۔ نئی دہلی سے حیدرآباد آنے کے بعد صحافیوں سے بات کرتے ہوئے، چیف منسٹر نے کہا کہ انہوں نے اے آئی سی سی صدر کے ساتھ کابینہ میں توسیع اور ٹی پی سی سی کے نئے صدر کی تقرری کا معاملہ اٹھایا ہے۔

تاہم، اس معاملہ پر فیصلہ ہائی کمان کے پاس زیر التواء ہے۔ انہوں نے میڈیا پر طنز کرتے ہوئے کہا میڈیا نے کابینہ میں توسیع کی اور بعد میں توسیع کو ملتوی کر دیا۔

میں نے کابینہ میں توسیع کے بارے میں کبھی کسی خاص تاریخ کا ذکر نہیں کیا۔ میں نے صرف کابینہ میں توسیع اور ٹی پی سی سی صدر کی تقرری معاملہ کو کل ہند کانگریس کمیٹی کے صدر کے ساتھ اٹھایا تھا۔

معاملہ اب ہائی کمان کے پاس ہے۔ اس سے پہلے میڈیا نے کابینہ میں توسیع کی، وزارتیں مختص کیں اور بعد میں اسے ملتوی کر دیا۔

میں نے ہائی کمان کو بتایا کہ ٹی پی سی سی کے صدر کے طور پر میری میعاد 7 جولائی کو ختم ہو جائے گی اور ہائی کمان سے کہا کہ اس سے پہلے ٹی پی سی سی کے نئے سربراہ کا تقرر کر دیا جائے گا۔