آگرہ میں اسکولی بچوں کو کار نے روندا، تین کی موت

آگرہ: اترپردیش میں آگرہ ضلع کے ڈاؤکی علاقے میں جمعرات کی صبح ایک تیز رفتار کار سڑک کے کنارے اسکول بس کے انتظار میں کھڑے بچوں پر چڑھ گئی۔

ان میں سے تین بچوں کی موقع پر ہی موت ہو گئی جبکہ تین دیگر شدید زخمی ہو گئے۔

حادثے سے ناراض گاؤں والوں نے فتح آباد آگرہ روڈ کو بلاک کر دیا ہے۔ پولیس موقع پر پہنچ گئی ہے۔

پولیس ذرائع نے بتایا کہ ڈاؤکی کے گاؤں باس مہاپت میں صبح آٹھ بجے بچے سڑک کے کنارے اسکول بس کا انتظار کر رہے تھے کہ فتح آباد روڈ سے آنے والی تیز رفتار کار نے چھ بچوں کو ٹکر مار دی۔

کچھ بچوں نے سڑک کنارے بھاگ کر اپنی جان بچائی۔

بچوں نے گاؤں جا کر اپنے گھر والوں کو بتایا۔ موقع پر پہنچ کر گاؤں والوں نے سڑک بلاک کر دی۔

اے سی پی فتح آباد سوربھ سنگھ نے بتایا کہ حادثے میں تین بچوں کی موت ہو گئی ہے۔

تین کو اسپتال میں داخل کرایا گیا ہے۔ گاؤں والوں کو سمجھا کر جام کھولنے کی کوشش کی جا رہی ہے۔