ٹوکیو ریور فرنٹ کا معائنہ،موسیٰ بحالی، میٹرو اور دیگر پروجیکٹس حیدرآباد کیلئے اہم: چیف منسٹرریونت ریڈی

حیدرآباد: چیف منسٹر اے ریونت ریڈی نے ہفتہ کے روز جاپان میں جاپان تلگو فیڈریشن کے زیر اہتمام منعقدہ ایک پروگرام میں شرکت کی، جہاں انہوں نے کہا کہ تلنگانہ نے آئی ٹی اور فارما شعبوں میں نمایاں ترقی حاصل کی ہے اور ریاست میں ایک ڈرائی پورٹ قائم کرنے کے منصوبہ بنایا گیا ہے۔

انہوں نے جاپان کے دارالحکومت ٹوکیو کے ریور فرنٹ کا دورہ کر کے وہاں کی سہولیات کا جائزہ لیا اور کہا کہ پانی ہماری ثقافت اور ترقی کی علامت ہے۔

 انہوں نے کہا کہ کچھ سیاسی طاقتیں موسیٰ بحالی پروجیکٹ میں رکاوٹیں پیدا کر رہی ہیں جبکہ دہلی میں آلودگی کی سنگینی کے باعث تعلیمی ادارے بند کیے جا رہے ہیں، ایسے میں ہمیں دہلی کی صورتحال سے سبق لینا چاہیے۔

حکومت نے حیدرآباد میں موسیٰ ندی کی بحالی کا فیصلہ اسی پس منظر میں کیا ہے۔ انہوں نے کہا کہ موسیٰ پروجیکٹ، میٹرو ریل کی توسیع، ریجنل رنگ روڈ اور ریڈیل روڈز تلنگانہ کی ترقی کے لیے نہایت اہم ہیں۔ ریاستی حکومت تلنگانہ میں بڑے پیمانے پر سرمایہ کاری، صنعتی ترقی اور روزگار کے مواقع پیدا کرنے کی خواہاں ہے اور عوام سے ریاست کی ترقی میں تعاون کرنے اور تجاویز پیش کرنے کی اپیل کی گئی ہے۔

 انہوں نے کہا کہ ہم پہلے ہی اپنی ریاست کی ترقی سے پرجوش لمحات محسوس کر رہے ہیں۔  ذرائع نے بتایا کہ تلنگانہ رائزنگ اقدام کے تحت،چیف منسٹر اے ریونت ریڈی کی قیادت میں ایک اعلیٰ سطحی وفد نے ٹوکیو واٹر فرنٹ کا دورہ کیا تاکہ عالمی سطح پر دریا کے کنارے کی ترقی کے بہترین طریقوں کا مطالعہ کیا جا سکے، جنہیں حیدرآباد کے مجوزہ  دریا موسیٰ کی صفائی کے منصوبہ میں اپنانے پر توجہ مرکوز کی گئی۔

اس دورے کا مرکز دریا سمِیڈا  جو ٹوکیو کے وسطی علاقہ سے گزرتا ہے اور جو سالوں کی منظم ترقی کے بعد ایک متحرک شہری مرکز بن چکا ہے۔

تلنگانہ وفد نے دریا  سمِیڈا  کے کناروں کی تبدیلی کے ماڈل کا بغور معائنہ کیا، جس میں پانی کے بہاؤ کے نظام، دریا کے کناروں کے ساتھ بنائے گئے طویل پُل، بلند راہداریوں، اور اس کی معاون شہری انفراسٹرکچر شامل تھے، جنہوں نے مجموعی طور پر ٹوکیو کے شہری منظر نامہ کو نیا رنگ دیا ہے۔

حکام نے بتایا کہ اس مطالعاتی  دورے کا تلنگانہ کے لیے خاص طور پر اہمیت ہے کیونکہ موسیٰ ندی کی ترقیاتی منصوبہ بندی ابھی اپنے تصوری مرحلہ میں ہے۔ ٹوکیو سے حاصل کی گئی بصیرت اب موسیٰ ندی  پروجیکٹ کی منصوبہ بندی، ڈیزائن، اور عمل درآمد کے دوران مدنظر رکھی جائے گی تاکہ یہاں عالمی معیار کی پائیداری، جمالیات اور شمولیت کو یقینی بنایا جا سکے۔

 دورے کے دوران، ریونت ریڈی اور ان کی ٹیم نے ٹوکیو کے دریا کے کنارے کے مختلف حصوں کا معائنہ کیا اور نقل و حمل، سیاحت اور ماحولیاتی بحالی کے انضمام کا مشاہدہ کیا۔ اس سفر کا مقصد یہ سمجھنا تھا کہ کس طرح عالمی سطح کے شہر دریا کے کناروں کو شہری سرگرمیوں، ثقافت کے مراکز میں تبدیل کرتے ہیں۔

 تلنگانہ حکومت نے کہا ہے کہ اس کا مقصد حیدرآباد کے موسیٰ ندی کو ایک زندہ اور پائیدار عوامی مقام میں تبدیل کرنا ہے، جس کے لیے وہ ٹوکیو جیسے کامیاب عالمی ماڈلز سے تحریک حاصل کی جا رہی ہے۔ ریاست اس منصوبہ میں جدید ترین ماہرین کی خدمات حاصل کرنے  کے لیے شراکت داریوں اور تکنیکی تعاون کی تلاش بھی کر رہی ہے۔