یونیورسٹی آف کولوراڈو ڈینور کو حیدرآباد میں کیمپس کھولنے کے لیے UGC کی منظوری
حیدرآباد میں قائم ہونے والا یہ کیمپس کسی امریکی سرکاری یونیورسٹی کا ہندوستان میں ڈگری پروگرام پیش کرنے والا پہلا کیمپس ہوگا۔ اس کے علاوہ یہ تلنگانہ میں قائم ہونے والا پہلا غیر ملکی یونیورسٹی کیمپس بھی ہوگا۔
حیدرآباد: امریکہ کی سرکاری یونیورسٹی یونیورسٹی آف کولوراڈو ڈینور کو حیدرآباد میں اپنا بین الاقوامی کیمپس قائم کرنے کے لیے یونیورسٹی گرانٹس کمیشن (UGC) کی منظوری مل گئی ہے۔
حیدرآباد میں قائم ہونے والا یہ کیمپس کسی امریکی سرکاری یونیورسٹی کا ہندوستان میں ڈگری پروگرام پیش کرنے والا پہلا کیمپس ہوگا۔ اس کے علاوہ یہ تلنگانہ میں قائم ہونے والا پہلا غیر ملکی یونیورسٹی کیمپس بھی ہوگا۔
یونیورسٹی کے حیدرآباد کیمپس میں اگست 2027 سے داخلوں کا آغاز متوقع ہے۔ ابتدائی مرحلے میں طلبہ کے لیے بزنس، کمپیوٹر سائنس، انجینئرنگ اور اینالیٹکس جیسے شعبوں میں ڈگری پروگرام پیش کیے جائیں گے۔
حیدرآباد کیمپس کے قیام سے ہندوستانی طلبہ کو امریکہ کی ایک سرکاری یونیورسٹی کے ڈگری پروگرام مقامی سطح پر حاصل کرنے کا موقع ملے گا۔ اس اقدام سے طلبہ کو بین الاقوامی تعلیمی ماحول اور عالمی سطح پر صنعت سے وابستہ مواقع تک رسائی بھی حاصل ہونے کی توقع ہے۔
یونیورسٹی آف کولوراڈو ڈینور کے کیمپس کے قیام کو تلنگانہ میں اعلیٰ تعلیم کے شعبے میں بین الاقوامی اداروں کی بڑھتی ہوئی دلچسپی کے طور پر دیکھا جارہا ہے۔ اس سے حیدرآباد کی تعلیمی اور ٹیکنالوجی مرکز کے طور پر پوزیشن مزید مضبوط ہونے کی بھی توقع ہے۔
UGC کی منظوری کے بعد یونیورسٹی کی جانب سے حیدرآباد کیمپس کے لیے مزید تعلیمی اور انتظامی تفصیلات جاری کیے جانے کی توقع ہے۔
