سکندرآباد کینٹونمنٹ سے چوری کیا گیا اسلحہ اور گولہ بارود برآمد کرلیا گیا

حیدرآباد : سکندرآباد کے انتہائی حساس اور سخت سکیورٹی والے کینٹونمنٹ علاقے میں واقع 20 مدراس رجمنٹ سے مبینہ طور پر اسلحہ اور گولہ بارود چوری کیے جانے کا معاملہ سامنے آیا ہے۔ اطلاعات کے مطابق ایک ریٹائرڈ فوجی حوالدار نے مبینہ طور پر اسکوٹی کے ذریعے چوری شدہ ہتھیار اور گولہ بارود کینٹونمنٹ علاقے سے باہر منتقل کیے۔

بتایا گیا ہے کہ واقعے کے بعد سکیورٹی اور تفتیشی اداروں نے کارروائی کرتے ہوئے تلنگانہ کے ناگر کرنول ضلع میں ریٹائرڈ حوالدار تک رسائی حاصل کی، جہاں سے مبینہ طور پر چوری کیا گیا اسلحہ اور گولہ بارود برآمد کرلیا گیا۔

واقعے نے فوجی تنصیبات کی سکیورٹی اور اسلحہ کے ذخیرے سے متعلق نگرانی کے نظام پر بھی سوالات کھڑے کردیئے ہیں۔ متعلقہ حکام کی جانب سے معاملے کی مزید تحقیقات جاری ہیں تاکہ یہ معلوم کیا جاسکے کہ اسلحہ کس طرح محفوظ فوجی احاطے سے باہر منتقل ہوا اور اس میں مزید کوئی شخص ملوث تھا یا نہیں۔

ریٹائرڈ حوالدار کے خلاف قانونی کارروائی اور تفتیش کے دوران اسلحہ کی چوری کے اصل مقصد اور دیگر ممکنہ روابط کا بھی پتہ لگایا جا رہا ہے۔