370 کی منسوخی کو چیلنج کرنے والی درخواستوں کی سماعت کے فیصلہ کا خیرم مقدم

سری نگر:ڈیموکریٹک پروگریسو آزاد پارٹی (ڈی پی اے پی) کے چیئر مین غلام نبی آزاد نے عدالت عظمیٰ کی طرف سے دفعہ 370 کی منسوخی کو چلینج کرنے والی درخواستوں کی 11 جولائی کو سماعت کے لئے جاری کی جانی والی نوٹس کا خیر مقدم کیا ہے۔

انہوں نے اپنے ایک بیان میں کہا: ‘عدالت عظمیٰ نے طویل عرصے کے بعد دفعہ 370 کی منسوخی کو چلینج کرنے والی درخواستوں کا نوٹس لیا ہے’۔

ان کا بیان میں کہنا تھا: ‘مجھے ایک مثبت نتیجے کی امید ہے کیونکہ میں مکمل حقوق کی بحالی کی خواہش رکھتا ہوں جو 5 اگست 2019 کو دفعہ 370 کی منسوخی کے ساتھ منسوخ ہوگئے’۔

آزاد نے مزید کہا کہ دفعہ 370،جموں و کشمیر کے تمام خطوں کے بلا لحاظ مذہب و ذات پات مفاد میں ہے۔ انہوں نے کہا: ‘ہم روز اول سے ہی اس پر زور دے رہے ہیں اور ہمیں یقین ہے کہ عدالت عظمیٰ جموں و کشمیر کے لوگوں کو انصاف اور ان کے مفادات کو تحفظ فراہم کرے گی’۔

قابل ذکر ہے کہ چیف جسٹس آف انڈیا ڈی وائی چندر چوڑ کی سربراہی میں عدالت عظمیٰ کی پانچ رکنی آئینی بینچ دفعہ 370 کی منسوخی کو چلینج کرنے والی درخواستوں کی سماعت 11 جولائی کو شروع کرے گی۔

عدالت عظمیٰ کے سامنے 20 سے زیادہ عرضیاں زیر التوا ہیں جن میں مرکزی حکومت کے دفعہ 370 کی منسوخی کے فیصلے کو چلینج کیا گیا ہے۔