تلنگانہ میں کھرگے، راہل گاندھی اور پرینکاگاندھی جلسوں سے خطاب کریں گے

حیدرآباد: کانگریس قیادت نے تلنگانہ اسمبلی انتخابات پر توجہ مرکوز کردی ہے۔اسی کے حصہ کے طورپر پارٹی کے قومی صدر ملکارجن کھرگے اس ماہ کی 18 تاریخ کو ریاست کا دورہ کرنے والے ہیں۔

اسی طرح اس بات کا پتہ چلا ہے کہ راہل گاندھی اور پرینکاگاندھی بھی ریاست کا دورہ کریں گے۔ دلت اور قبائلی ڈکلریشن کے بشمول بی سی، خواتین کے ڈکلریشن کے اعلان کے لئے پی سی سی کوششیں کررہی ہے۔

ا ن انتخابات میں تمام لیڈروں کے متحدہ طورپر مقابلہ کرتے ہوئے پارٹی کو کامیابی سے ہمکنار بنانے کے سلسلہ میں پارٹی قیادت کام کررہی ہے۔

اسی کے حصہ کے طورپر پارٹی کے مختلف شعبہ جات کے صدورنشین کوریاست کو بھیج کر ریاست میں ان شعبہ جات کے ساتھ اجلاس منعقد کئے جارہے ہیں۔

ان شعبہ جات کے پروگرام کے ذریعہ علاقائی سطح پر رائے دہندوں پر اثرانداز ہونے کی کوششیں شروع کردی گئی ہیں۔حال ہی میں گجویل میں یوجنا کانگریس کے بے روزگاری کے جلسہ میں یوجنا کانگریس کے قومی صدرسرینواس نے شرکت کی تھی۔

حیدرآبادمیں منعقدہ ریاستی مہیلا کانگریس کے پروگرام میں مہیلا کانگریس کی قومی صدراین ڈیسوزا نے شرکت کی تھی۔ان جلسوں کے ذریعہ کارکنوں کو مختلف ہدایات دی گئیں۔ریاستی فشرمین کانگریس کے اجلاس میں اے آئی سی سی فشرمین صدرنشین فرنانڈو نے شرکت کی تھی۔

ریاستی نمائندوں کے ساتھ اجلاس منعقدکرنے والے کسان کانگریس کے قومی صدرایس کھیرا نے زراعت پر مرکزی اور ریاستی حکومتوں کی پالیسی اور طریقہ کار کے خلاف جدوجہد کا مشورہ دیا تھا۔

اس ماہ کی 18 تاریخ کو اے آئی سی سی کے صدرملکارجن کھرگے حیدرآباد کا دورہ کریں گے۔وہ ایک بڑے جلسہ سے خطاب کریں گے۔اس جلسہ کے ذریعہ دلتوں، قبائلیوں کے ڈکلریشن کا اعلان کیا جائے گاجس کے لئے تیاریاں جاری ہیں۔

یہ جلسہ کہاں منعقد کیاجائے،اس پر پی سی سی غور کررہی ہے۔اس ماہ کے اواخر میں کانگریس کے سابق صدرراہل گاندھی، پارٹی کی جنرل سکریٹری پرینکاگاندھی کے دورہ کی توقع ہے۔

محبوب نگر کے کولاپور میں پرینکا گاندھی کے جلسہ کی توقع ہے۔راہل گاندھی کے عنقریب ہونے والے جلسہ کے سلسلہ میں بھی پی سی سی منصوبہ بنارہا ہے۔ ان جلسوں کے ذریعہ ریاستی اور مرکزی حکومتوں کی ناکامیوں کواجاگر کیاجائے گا۔