وجئے شانتی، انتخابی مہم ومنصوبہ بندی کمیٹی، کی چیف کوآرڈینٹر مقرر

نئی دہلی: اب جبکہ تلنگانہ اسمبلی انتخابات کیلئے دو ہفتوں سے بھی کم وقت رہ گیا ہے، صدر کانگریس ملکارجن کھرگے نے پارٹی میں شمولیت کے ایک دن بعد اداکارہ سے سیاست داں بنی وجئے شانتی کو پارٹی کی انتخابی مہم ومنصوبہ بندی کمیٹی کا چیف کوآرڈنٹر مقرر کیا ہے۔

کانگریس کے جنرل سکریٹری (تنظیمی امور) کے سی وینوگوپال نے کہا کہ پارٹی صدر نے کانگریس کی انتخابی مہم اور منصوبہ بندی کمیٹی کا چیف کوآرڈنیٹر بنانے کی تجویز کو منظوری دے دی جس کا اطلاق فوری اثر کے ساتھ ہوگا۔

قبل ازیں ایک ہفتہ قبل وجئے شانتی نے بھگوا جماعت سے استعفیٰ دے کر جمعہ کے روز کانگریس میں شمولیت اختیار کرلی۔

کھرگے نے کمیٹی کے کنوینرس کے طور پر سمرسمہا ریڈی، پشا لیلا، ملوروی، ایم کودنڈا ریڈی، ویم نریندر ریڈی، ایراوتی انیل،راملو نائک،پی ناگیشور راؤ، عبید اللہ کوتوال، رمیش مدیراج، پریجاتا ریڈی، سدیشور، رام مورتی نائک، علی بن ابراہیم مسقطی اور دیپک جان کو نامزد کیا ہے۔