کیا ریپ کیس میں شوہر کیلئے قانون میں کوئی رعایت ہے؟ سپریم کورٹ غور کرےگی

نئی دہلی: سپریم کورٹ نے تعزیرات ہند کے تحت جنسی زیادتی کے معاملے میں متاثرہ خاتون کے شوہر کو استثنیٰ دینے کے معاملے میں دہلی ہائی کورٹ کے الگ الگ فیصلے کے بعد دائر درخواستوں پر جمعہ کو مرکزی حکومت کو نوٹس جاری کیا۔

جسٹس اجے رستوگی اور بی وی ناگرتھنا کی بنچ نے ہائی کورٹ کے 11 مئی کے فیصلے کے خلاف دائر درخواستوں پر مرکزی حکومت سے جواب طلب کیا اور کہا کہ وہ اس معاملے پر اگلے سال فروری میں غور کرے گی۔ بنچ نے تمام زیر التوا مقدمات کو یکجا کرنے کا فیصلہ کیا اور کہا کہ وہ اس معاملے کو دیکھے گی۔

دہلی ہائی کورٹ نے اس سال 11 مئی کو تعزیرات ہند (آئی پی سی) کی دفعہ 375 کے استثنیٰ 2 کے جواز کو چیلنج کرنے والی ایک درخواست پر الگ الگ فیصلہ دیا تھا۔

پی آئی ایل کی سماعت کے بعد جسٹس راجیو شکدھر نے ازدواجی عصمت ریزی کی استثنیٰ کو ختم کر دیا، جب کہ بنچ کے ایک اور جسٹس سی ہری شنکر نے یہ نتیجہ اخذ کیا کہ آئی پی سی کے تحت کی گئی شق غیر آئینی نہیں ہے اور اختلاف رائے پر مبنی ہے۔

مرکزی حکومت نے ہائی کورٹ کے سامنے یہ کہتے ہوئے اس معاملے پر کوئی موقف نہیں اپنایا تھا کہ اسے ریاستوں اور مرکز کے زیر انتظام علاقوں سمیت تمام اسٹیک ہولڈرز سے مشورہ کرنے کی ضرورت ہے۔

‘آل انڈیا ڈیموکریٹک ویمنز ایسوسی ایشن’ کی طرف سے پیش ہونے والی وکیل کرونا نندی نے سپریم کورٹ کے سامنے دلیل دی کہ یہاں اس معاملے میں قانون کا ایک بڑا سوال ہے۔ ہائی کورٹ کے دو ججوں نے مختلف خیالات کا اظہار کرتے ہوئے اس بات پر اتفاق کیا کہ اس معاملے پر سپریم کورٹ کو غور کرنا چاہیے۔

سینئر وکیل گوپال شنکرنارائن نے اصل درخواست میں 2018 سے زیر التوا کیس کو شامل کرنے کی مانگ کی تھی۔ انہوں نے کہا کہ بار بار کی درخواستوں کے باوجود سماعت نہیں ہو سکی۔