کیرالہ میں ممنوعہ تمباکو کی 15 ہزار پیکٹیں ضبط، دو افراد گرفتار
میلپرمبا تھانے کے سب انسپکٹر اکھل ٹی کو اس مقام پر بڑے پیمانے پر غیر قانونی سرگرمیوں سے متعلق خفیہ اطلاع موصول ہوئی تھی، جس کے بعد پولیس نے چھاپہ مارا۔ تلاشی کے دوران عمارت میں ایک خفیہ کمرہ برآمد ہوا، جہاں مبینہ طور پر کارکن مشینوں کے ذریعے تمباکو مصنوعات کی پیکنگ کر رہے تھے۔
کاسرگوڈ: کیرالہ کے ضلع کاسرگوڈ میں پولیس نے ممنوعہ تمباکو مصنوعات تیار کرنے اور پیکنگ کرنے والے ایک بڑے غیر قانونی مرکز کا پردہ فاش کرتے ہوئے 15 ہزار پیکٹ ممنوعہ تمباکو مصنوعات، مشینری اور خام مال ضبط کر لیا۔ کارروائی کے دوران دو افراد کو گرفتار بھی کیا گیا۔
یہ کارروائی میلپرمبا پولیس نے آپریشن طوفان کے تحت ضلع کے بارا گاؤں کے مایلاتی علاقے میں قومی شاہراہ کے قریب واقع ایک کرائے کی عمارت پر کی، جہاں "قریشی ایکسپریس” کا بورڈ لگا ہوا تھا۔
پولیس کے مطابق مذکورہ عمارت کو خفیہ طور پر ممنوعہ تمباکو مصنوعات کی تیاری اور پیکنگ کے مرکز کے طور پر استعمال کیا جا رہا تھا۔
میلپرمبا تھانے کے سب انسپکٹر اکھل ٹی کو اس مقام پر بڑے پیمانے پر غیر قانونی سرگرمیوں سے متعلق خفیہ اطلاع موصول ہوئی تھی، جس کے بعد پولیس نے چھاپہ مارا۔ تلاشی کے دوران عمارت میں ایک خفیہ کمرہ برآمد ہوا، جہاں مبینہ طور پر کارکن مشینوں کے ذریعے تمباکو مصنوعات کی پیکنگ کر رہے تھے۔
کارروائی کے دوران فروخت کے لیے تیار 15 ہزار پیکٹ ممنوعہ تمباکو مصنوعات کے علاوہ بڑی مقدار میں خام تمباکو، پیکنگ کا سامان اور تیاری میں استعمال ہونے والی مشینری بھی ضبط کی گئی۔
پولیس کے مطابق ملزمان موجودہ قوانین کی خلاف ورزی کرتے ہوئے ممنوعہ تمباکو مصنوعات کی غیر قانونی تیاری اور پیکنگ میں ملوث تھے۔ پولیس خام مال کی سپلائی اور اس غیر قانونی نیٹ ورک سے وابستہ تقسیم کاروں کی شناخت کے لیے مزید تحقیقات کر رہی ہے۔
