تلنگانہ میں 2 دن با اجرت تعطیل کا اعلان

حیدرآباد: تلنگانہ حکومت نے تمام سرکاری ملازمین کو لوک سبھا انتخابات اور سکندرآباد کنٹونمنٹ ضمنی انتخابات میں حصہ لینے کی اجازت دینے کے لئے 13 مئی اور 4 جون کو بااجرت تعطیل کا اعلان کیا ہے۔

چیف سکریٹری اے سانتھی کماری نے ضلع کلکٹرس اور ضلعی انتخابی افسران کو ہدایت دی کہ وہ حکومت کی ہدایت کے مطابق 2 بااجرت تعطیلات پر عمل آوری کریں۔

واضح رہے کہ تلنگانہ میں لوک سبھا انتخابات 13 مئی 2024 کو ایک ہی مرحلے میں ہوں گے جبکہ لوک سبھا انتخابات کے تمام حلقوں کے ووٹوں کی گنتی 4 جون کو ہوگی۔

ریاست میں گرمی کی لہر کے پیش نظر 12 لوک سبھا حلقوں میں پولنگ کا وقت صبح 7 بجے سے شام 6 بجے تک مقرر کیا گیا ہے۔

سکندرآباد کنٹونمنٹ اسمبلی حلقہ میں جو ملکاجگری لوک سبھا سیٹ کا حصہ ہے، ووٹروں کو 13 مئی کو دو ووٹ ڈالنے ہوں گے – ایک لوک سبھا انتخاب کے لئے اور دوسرا سکندرآباد کنٹونمنٹ اسمبلی حلقہ کے ضمنی انتخاب کے لئے۔

اس کی وجہ یہ ہے کہ سکندرآباد کنٹونمنٹ سیٹ بی آر ایس رکن اسمبلی لاسیہ نادیتھا کی ایک سڑک حادثہ میں المناک موت ہوگئی تھی۔ اس کے بعد یہ سیٹ خالی ہوگئی تھی جس پر 13 مئی کو ضمنی انتخاب مقرر ہے۔

الیکشن کمیشن نے انتخابات کے لئے وسیع تر انتظامات کئے ہیں، جن میں 3,986 پولنگ اسٹیشنوں کا قیام، 23,500 ملازمین کو انتخابی عملے کے طور پر تعینات کرنا اور آگاہی مہم کے ذریعے ووٹر ٹرن آؤٹ بڑھانے کے اقدامات شامل ہیں۔