بھٹی نے امریکہ میں مقیم این آر آئیز کو تلنگانہ میں سرمایہ کاری کے لیے کیا مدعو

حیدرآباد: تلنگانہ کے نائب وزیر اعلیٰ ملو بھٹی وکرمارک نے اتوار کو امریکہ میں رہنے والے تیلگو این آر آئیز کو ریاست میں سرمایہ کاری کے لیے مدعو کیا۔ انہوں نے مسلسل سرمایہ کاری، بنیادی ڈھانچے کی توسیع اور عوامی فلاح و بہبود کی ترقی کے ذریعے 2047 تک تلنگانہ کو تین ٹریلین ڈالر کی معیشت بنانے کے عزم کا بھی اظہار کیا۔

امریکہ کے دورے کے دوران بیرون ملک مقیم ہندوستانیوں (آئی او سی) کے نمائندوں سے خطاب کرتے ہوئے مسٹر بھٹی نے کہا کہ ریاستی حکومت ‘تلنگانہ رائزنگ 2047’ وژن کو نافذ کر رہی ہے۔ اس کا مقصد 2047 تک اسے تین ٹریلین امریکی ڈالر تک بڑھانے سے پہلے اگلے پانچ سال کے اندر تلنگانہ کو ایک ٹریلین امریکی ڈالر کی معیشت بنانا ہے۔

انہوں نے کہا کہ مچرلا میں مجوزہ ‘بھارت فیوچر سٹی’، جسے نیٹ زیرو اور آلودگی سے پاک معیارات پر تیار کیا جا رہا ہے، حیدرآباد، سکندرآباد اور سائبرآباد کے بعد ریاست کے چوتھے اہم شہری مرکز کے طور پر ابھرے گی۔

تارکینِ وطن ہندوستانیوں کو تلنگانہ کی ترقی میں حصہ دار بننے کی اپیل کرتے ہوئے انہوں نے کہا کہ ریاست سماجی فلاح و بہبود کے ساتھ اقتصادی ترقی کا توازن بناتے ہوئے خود کو عالمی سرمایہ کاری کی منزل کے طور پر قائم کر رہی ہے۔ تعلیم اور ہنرمندی کے فروغ میں اصلاحات پر بات کرتے ہوئے انہوں نے کہا کہ حکومت نے ینگ انڈیا اسکل یونیورسٹی قائم کی ہے۔

حکومت ٹاٹا گروپ کی شراکت داری میں انڈسٹریل ٹریننگ انسٹی ٹیوٹ (آئی ٹی آئی) کو ڈیجیٹل اسکل سینٹرز میں جدید بنا رہی ہے اور ہر اسمبلی حلقے میں مربوط رہائشی اسکول قائم کر رہی ہے۔

مسٹر بھٹی نے سرکاری اسکولوں کے 27 لاکھ طلباء کے لیے ناشتے کی اسکیم اور انٹرمیڈیٹ کے طلباء تک مڈ ڈے میل اسکیم کی توسیع پر بھی بات کی۔ نائب وزیر اعلیٰ نے کہا کہ جھیلوں اور سرکاری زمینوں پر تجاوزات کو روکنے کے لیے ہائیڈرا سسٹم شروع کیا گیا ہے، جبکہ موسی ندی کے کناروں کی ترقی کے پروجیکٹ کا مقصد ندی کو دوبارہ زندہ کرنا اور اسے سیاحت و تجارتی مرکز میں تبدیل کرنا ہے۔

پچھلی بی آر ایس حکومت پر تنقید کرتے ہوئے مسٹر بھٹی نے الزام لگایا کہ اس نے ایک دہائی کی طویل حکومت میں ریاست کو قرض کے جال میں دھکیل دیا تھا۔ انہوں نے کہا کہ موجودہ حکومت نے مالیاتی نظم و ضبط بحال کیا ہے اور یہ یقینی بنایا کہ سرکاری ملازمین کو ہر ماہ کی پہلی تاریخ کو تنخواہ ملے اور ملازمین کے لیے 1.20 کروڑ روپے کا مفت حادثاتی بیمہ شروع کیا ہے۔

مسٹر بھٹی نے کہا کہ حکومت لوگوں کی زندگیوں کو بہتر بنانے کے لیے خواتین کے لیے مفت بس سفر، 500 روپے میں ایل پی جی سلنڈر، مفت بجلی اور توسیع شدہ آروگیہ شری کوریج سمیت چھ ضمانتوں کو نافذ کر رہی ہے۔