آئندہ الیکشن میں بی آر ایس کی شاندار کامیابی۔ ماہر علم نجوم پرشانت کنی کی پیش قیاسی

حیدرآباد (منصف نیوز بیورو) سیاسی جماعتوں میں توہم پرستی عام بات ہے۔بی آر ایس قائدین بھی علم نجوم پر یقین رکھتے ہیں خاص کر کے سی آر اور ان کے افراد خاندان کو ان باتوں پر بہت حد تک یقین ہے اس سلسلہ کے تحت کے سی آر خاندان جو ان دنوں سیاسی کشمکش کا شکار ہے، کے لئے ایک اچھی خبر سامنے آئی ہے۔

مشہور نجومی پرشانت کنی نے پیشین گوئی کی ہے کہ سابق چیف منسٹر کے چندر شیکھر راؤ پھر ایک بار چیف منسٹر بنیں گے۔ 2028 میں اسمبلی انتخابات میں بی آر یس کو کامیابی حاصل ہوگی اور کے سی آر ایک بار پھر تلنگانہ کے چیف منسٹر بنیں گے۔

پرشانت کنی جنہوں نے بنگلہ دیش کی وزیر اعظم شیخ حسینہ واجد کے زوال کی پیشین گوئی کی تھی اور کہا تھا شیخ حسینہ واجد کو مستقبل میں قاتلانہ حملہ کا سامنا کرنا پڑ سکتا ہے، نے کہا کہ بی آر ایس کے صدر کے سی آر 2028 کے اسمبلی انتخابات میں اقتدار پر واپسی کریں گے۔

انہوں نے یہ بھی پیشین گوئی کی کہ کے سی آر اکتوبر 2026 میں بیمار ہو جائیں گے اور جنوری 2027 کے بعد ان کی قسمت بدل جائے گی۔

کے سی آر اس کے بعد سے مئی 2029 تک سیاست میں سرگرم ہو جائیں گے۔ پرشانت کنی، جو خود کو شیطان کا نجومی، ٹائم ٹریولر نجومی، پامسٹری کا ماہر اور سیاست اور جیو پولیٹکس کا ماہر بتاتے ہیں نے پیشین گوئی کی کہ کے سی آر اس وقت اہم ترین سیاست دان بن جائیں گے۔

2028 کے انتخابات کے بعد ایک بار پھر تلنگانہ کے چیف منسٹر بنیں گے اور بی آر یس کو زبردست اکثریت حاصل ہوگی۔ انہوں نے اپنے ایکس اکاؤنٹ پر اس بات کے بارے میں پوسٹ کیا کہ کے چندر شیکھر راؤ کے بارے میں میری پیشین گوئی ہے کہ جب راہو دشا مریخ انتردشا شروع ہوئی تو انہیں عہدے چیف منسٹر سے ہاتھ دھونا پڑا۔

ان کا ہارواسکوپ مریخ راہو سے 12ویں نمبر پر ہے۔ مشتری دشا کا آغاز ستمبر 2024 میں ہوا تھا۔ وہ اکتوبر 2026 میں بیمار پڑ سکتے ہیں۔ جنوری 2027 کے بعد ان کی قسمت بدل جائے گی۔ جنوری 2027 سے مئی 2029 تک وہ سیاست میں سرگرم ہو جائیں گے۔ 2029 ان کے لیے اچھا سال رہیگا اور وہ اقتدار پر واپسی کریں گے۔