جی ایس پی ڈی اور فی کس آمدنی میں کمی،کانگریس قیادت ذمہ دار: کے ٹی آر

حیدرآباد: بی آر ایس کے کارگذارصدر کے ٹی راما راؤ نے تلنگانہ کی مجموعی ریاستی گھریلو پیداوار (جی ایس پی ڈی) اور فی کس آمدنی میں مالی سال 2024-25 کے دوران ریکارڈ کی گئی کمی کے لئے کانگریس قیادت کو موردِ الزام ٹھہرایا۔

انہوں نے کہا کہ دہلی کی جماعتوں پر بھروسہ کرنا تلنگانہ کو تباہی کی طرف لے جائے گا اور یہ بات ایک بار پھر ثابت ہو چکی ہے۔انہوں نے کہا کہ آج تلنگانہ کے عوام سیاسی جماعتوں اور ویژن سے عاری لیڈروں پر اعتماد کرنے کے نتائج بھگت رہے ہیں۔

”کانگریس نے ایک نامناسب رہنما کو ایک اہم عہدے پر فائز کر کے اُس ریاست کو تباہ کر دیا جو دہائیوں کی جدوجہد سے تعمیر ہوئی تھی، اور اب وہ چار کروڑ عوام کی زندگیوں سے کھیل رہے ہیں،” ۔

حیدرآباد کے رئیل اسٹیٹ کا حوالہ دیتے ہوئے راما راؤ نے کہا کہ ایک اعلیٰ کارکردگی دکھانے والی ریاست کو معیشت کی نچلی سطح پر لے جانا ناقابل معافی گناہ ہے۔ انہوں نے خبردار کیا کہ کانگریس کے ہاتھوں میں تلنگانہ کو سونپنے کے نتائج تباہ کن ہوں گے۔