بیٹی کی محبت کی شادی، برہم سرپنچ نے داماد کے مکان کو آگ لگادی

حیدرآباد:بیٹی کی محبت کی شادی پر برہم سرپنچ نے اپنے داماد کے گھر کے ساتھ ساتھ اس شادی میں معاونت کرنے والوں کے مکانات پر بھی حملہ کیا اور مکانات کو آگ لگادی۔ یہ واقعہ تلنگانہ کے ورنگل ضلع کے نرسم پیٹ میں پیش آیا۔اٹکیلاپلی گاوں کے سرپنچ رویندر کی بیٹی کاویا شری،اسی گاؤں کے رنجیت سے محبت کرتی تھی۔

کاویا، جو حسن پارتی کے ایک ہاسٹل میں تھی، گھر والوں کو بتائے بغیر رنجیت کے ساتھ چلی گئی اور اس سے شادی کر لی۔ والدین کی شکایت پر حسن پارتھی پولیس ان دونوں کو پولیس اسٹیشن لے آئی اور ان سے بات کی۔

جب کاویا نے اپنے باپ کے گھر جانے سے انکا رکردیا تو سرپنچ نے برہمی کااظہار کیااوربعد ازاں اس نے اپنے داماد کے ساتھ ساتھ اس کے دوستوں کے مکانات پر بھی حملہ کرتے ہوئے مکانات کو نذرآتش کردیا۔ سرپنچ کے رویہ سے گاؤں میں کشیدگی دیکھی جارہی ہے۔