نائب وزیر اعلیٰ شنڈے کا ممبئی پونے ایکسپریس وے پر ‘مسنگ لنک’ دورہ

کولہاپور: مہاراشٹر کے نائب وزیر اعلیٰ ایکناتھ شنڈے نے کل ممبئی پونے ایکسپریس وے پر زیرِ تعمیر ‘مسنگ لنک’ منصوبے کا دورہ کیا۔ اس موقع پر انہوں نے کہا کہ یہ منصوبہ گھاٹ کے علاقے میں ٹریفک کے دباؤ کو نمایاں طور پر کم کرے گا، جس سے سفر تیز تر، محفوظ اور سگنل فری ہو جائے گا، اور اس سے معیشت کو بھی فروغ ملے گا۔

انہوں نے بتایا کہ ‘مسنگ لنک’ منصوبہ، جو ممبئی پونے ایکسپریس وے کو مکمل طور پر ‘ایکسس کنٹرولڈ’ بنا دے گا، 99 فیصد مکمل ہو چکا ہے اور یکم مئی کو وزیر اعلیٰ دیویندر فڑنویس اس کا افتتاح کریں گے۔

منصوبے کے معائنے کے بعد شنڈے نے کہا، "میں نے ذاتی طور پر یہاں آ کر کام کے معیار کا جائزہ لیا ہے اور اب تک کا کام اطمینان بخش ہے۔ بقیہ معمولی کام اگلے چند دنوں میں مکمل کر لیے جائیں گے۔ حکام کو واضح ہدایات دی گئی ہیں کہ وہ کام کو وقت پر اور اعلیٰ معیار کے ساتھ مکمل کریں۔”

اس مسنگ لنک کے شروع ہونے سے گھاٹ کے خطرناک موڑ اور ٹریفک کا بوجھ ختم ہو جائے گا اور سفر کا وقت ۔20 سے 30 منٹ۔ تک کم ہو جائے گا۔ شنڈے نے دعویٰ کیا کہ اس منصوبے سے گھاٹ پر ہونے والے حادثات تقریباً صفر ہو جائیں گے۔