کیا آپ کی جیب میں بھی 500 روپئے کے جعلی نوٹس تو نہیں، عوام کیلئے مرکزی حکومت کی اہم ہدایت جاری

نئی دہلی: ملک میں جعلی کرنسی کی گردش کو دیکھتے ہوئے مرکزی حکومت نے چوکسی اختیار کرنے کی ہدایت جاری کی ہے۔ خاص طور پر 500 روپے کے جعلی نوٹ اصل نوٹوں سے مشابہت رکھتے ہیں، جس کے باعث ان کی پہچان مشکل ہو گئی ہے۔ اس پس منظر میں مرکزی حکومت نے CBI، NIA، ڈائریکٹوریٹ آف ریونیو انٹیلیجنس، SEBI اور فنانشل انٹیلیجنس یونٹ سمیت کئی تحقیقاتی ایجنسیوں کو الرٹ جاری کیا ہے۔

جعلی نوٹ میں ’E‘ کی جگہ ’A‘!

رپورٹس کے مطابق، جعلی نوٹ دیکھنے میں اصل جیسے ہی ہیں، تاہم ان میں معمولی فرق پایا جاتا ہے۔ مثال کے طور پر، جعلی نوٹ میں "RESERVE BANK OF INDIA” میں موجود لفظ "RESERVE” میں ‘E’ کی جگہ ’A‘ لکھا گیا ہے۔ اس معمولی تبدیلی سے بھی جعلی نوٹ کی شناخت کی جا سکتی ہے۔

عوام کیلئے مرکزی حکومت کی پانچ اہم ہدایات:

500 روپے کے اصل نوٹ کی شناخت کے طریقے:

1. "RESERVE BANK OF INDIA” کی اسپیلنگ کو بغور چیک کریں۔ اگر اسپیلنگ میں فرق ہو تو نوٹ جعلی ہو سکتا ہے۔
2. اصلی نوٹ میں سیکیورٹی تھریڈ ہوتا ہے، جو نوٹ کو زاویہ سے گھمانے پر سبز سے نیلے رنگ میں تبدیل ہوتا ہے، اور اس پر "भारत” اور "RBI” کے الفاظ لکھے ہوتے ہیں۔
3. روشنی میں نوٹ کو دیکھنے پر مہاتما گاندھی کا واٹر مارک اور الیکٹروٹائپ واٹر مارک میں "500” کا عدد نظر آتا ہے۔
4. مہاتما گاندھی کی تصویر، اشوک ستون، اور شناختی نشان جیسے اہم اجزاء ابھری ہوئی پرنٹنگ (Intaglio Printing) میں ہوتے ہیں، یعنی انہیں چھو کر محسوس کیا جا سکتا ہے۔
5. RBI کی آفیشل موبائل ایپ ‘MANI’ (Money) کے ذریعے نوٹ کی تصدیق کریں، یا UV لائٹ کے تحت دیکھنے پر سیکیورٹی تھریڈ اور سیریل نمبر چمکتے ہیں۔