مشرقی رفح سے شہریوں کا انخلاء شروع۔ اسرائیل زمینی حملہ کرنے کے لئے تیار

یروشلم: اسرائیلی فوج نے پیر کے دن جنوبی غزہ کے شہر رفح کے لاکھوں لوگوں کو حکم دیا کہ وہ علاقہ خالی کرنا شروع کردیں۔ اس طرح اس نے زمینی حملہ شروع کردینے کا اشارہ دیا۔

اس اعلان نے بین الاقوامی ثالثی کی لمحہ آخر کی کوششوں کو پیچیدہ کردیا۔ ڈائرکٹر سی آئی اے اور قطر نے خبردار کیا ہے کہ رفح پر حملہ سے بات چیت پٹری سے اتر جائے گی۔ اسرائیل نے رفح کو حماس کا آخری اہم گڑھ قراردیا ہے۔

اس کے قائدین باربار کہتے رہے ہیں کہ حماس کو شکست دینے کے لئے رفح پر زمینی حملہ ضروری ہے۔ اسرائیلی فوج کے ترجمان نے کہا کہ کوئی ایک لاکھ لوگوں کو حکم دیا گیا ہے کہ وہ قریب میں واقع مواسی زون میں منتقل ہوجائیں۔ اس علاقہ کو اسرائیل نے انسانی زون قراردیا ہے۔

اس نے کہا کہ اسرائیل محدود فوجی کارروائی کی تیاری میں ہے۔ کہا نہیں جاسکتا کہ یہ کارروائی شہر پر بڑے حملہ کا آغاز ہوگی۔ اسرائیل نے خالی کرائے جانے والے علاقہ کا نقشہ شائع کیا۔ ہیلی کاپٹرس سے ورقیے گرائے جارہے ہیں۔ ٹیکسٹ پیامات اور ریڈیو پر اعلان بھی ہورہا ہے کہ لوگ کوچ کی تیاری کریں۔ اسرائیل نے مواسی میں انسانی امداد بڑھادی ہے۔

اس نے وہاں فیلڈ ہاسپٹل قائم کئے ہیں‘ خیمے نصب کئے ہیں‘ غذا اور پانی کا انتظام کیا ہے۔ رفح پر حملہ کے اسرائیل کے منصوبہ نے دنیا میں تشویش بڑھادی ہے۔ تقریباً 14 لاکھ فلسطینی جو غزہ کی جملہ آبادی کا نصف سے زائد ہیں‘ رفح کے اطراف ٹاؤنس میں پناہ لئے ہوئے ہیں۔

اسرائیل کے قریبی حلیف امریکہ نے باربار اسرائیل سے کہا کہ وہ رفح پر حملہ نہ کرے۔ امریکہ‘ مصر اور قطر جنگ بندی کے لئے کوشاں ہیں۔ غزہ سے یو این آئی کے بموجب صیہونی فوج نے گزشتہ 24 گھنٹوں کے دوران رفح پر حملہ کرکے مزید 22 فلسطینیوں کو شہید کردیا جب کہ عام شہریوں کو رفح خالی کرنے کے بھی احکامات دیے گئے ہیں۔

عرب میڈیا کے مطابق اسرائیلی فوج کی جانب سے 5 سے زائد رہائشی گھروں کا نشانہ بنایا گیا جس کے نتیجے میں 22 افراد شہید ہوگئے۔اسرائیل کی جانب سے رفح پر یہ حملے فلسطینی مزاحمتی تنظیم حماس کے جنگجوؤں کے حملے میں 3 اسرائیلی فوجی ہلاک ہو نے کے بعد کیے گئے۔

دوسری جانب عرب میڈیا کا کہنا ہے کہ اسرائیلی فوج نے رفح میں پناہ لینے والے عام شہریوں کو فوری علاقہ چھوڑنے کے احکامات جاری کردیے ہیں جس کے نتیجہ میں مشرقی رفح سے شہریوں نے انخلا شروع کردیاہے۔غزہ میں اسرائیلی حملوں سے خوفزدہ 15 لاکھ فلسطینی شہریوں نے رفح میں پناہ لے رکھی ہے۔

اسرائیلی فوج کی جانب سے کہا گیا کہ مشرقی رفح میں موجود لوگ خان یونس شہر اور المواسی ٹاون میں موجود اسرائیلی فوج کی جانب سے بنائے گئے عارضی کیمپس میں چلے جائیں۔اسرائیلی فوج کے ترجمان کا کہنا ہے کہ ہم متوقع زمینی آپریشن سے پہلے مشرقی رفح سے ایک لاکھ لوگوں کو نکال رہے ہیں۔

یاد رہے کہ عالمی برداری پہلے ہی اسرائیل کو رفح میں زمینی آپریشن کی صورت میں تباہ کن نتائج سے خبردار کرچکی ہے۔علاوہ ازیں اسرائیل نے قطر کے نشریاتی ادارے الجزیرہ ٹی وی کو بھی بند کردیا ہے جب کہ اسرائیلی حکام نے الجزیرہ ٹی وی کی نشریات کو روکنے کے بعد اس کا سامان ضبط کرلیا اور ویب سائٹ بھی بلاک کردی۔