تلنگانہ کے سابق رکن اسمبلی اور بی آر ایس رہنما پیڈی سدرشن ریڈی کا انتقال

حیدرآباد: تلنگانہ کے ضلع نرسم پیٹ کے سابق رکن اسمبلی اور بھارت راشٹر سمیتی (بی آر ایس) کے سینئر رہنما پیڈی سدرشن ریڈی کا جمعہ کی علی الصبح سکندرآباد کے یشودا اسپتال میں دورانِ علاج انتقال ہوگیا۔ وہ 52 برس کے تھے۔ پسماندگان میں اہلیہ، ایک بیٹا اور ایک بیٹی شامل ہیں۔

اسپتال حکام کے مطابق شدید پلمونری ایمبولزم اور پھیپھڑوں کے انفیکشن کے باعث انہوں نے رات 12 بج کر 51 منٹ پر آخری سانس لی۔ انہیں 26 جولائی کو ہنم کونڈہ میں دل کا دورہ پڑنے کے بعد اسپتال میں داخل کرایا گیا تھا۔

پیڈی سدرشن ریڈی 6 اگست 1974 کو اُس وقت کے ورنگل ضلع کے نلّا بیلی گاؤں میں ایک کسان خاندان میں پیدا ہوئے تھے۔ وہ تلنگانہ تحریک کے اہم رہنماؤں میں شمار ہوتے تھے اور 2001 میں تلنگانہ راشٹر سمیتی (موجودہ بی آر ایس) میں شامل ہوئے۔ اسی سال وہ نلّا بیلی ضلع پریشد علاقائی حلقے کے رکن منتخب ہوئے۔

بعد ازاں انہوں نے پارٹی میں کئی اہم تنظیمی ذمہ داریاں سنبھالیں اور 2015 میں تلنگانہ ریاستی شہری رسد کارپوریشن کے چیئرمین مقرر ہوئے۔ 2018 کے اسمبلی انتخابات میں وہ نرسم پیٹ اسمبلی حلقے سے رکن اسمبلی منتخب ہوئے تھے۔

سابق وزیر ایربیلی دیاکر راؤ کے مطابق ان کے جسد خاکی کو پہلے ہنم کونڈہ میں تلنگانہ شہداء یادگار پر خراج عقیدت پیش کرنے کے لیے رکھا جائے گا، جس کے بعد آبائی گاؤں نلّا بیلی لے جایا جائے گا، جہاں آج سہ پہر تین بجے آخری رسومات ادا کی جائیں گی۔

بی آر ایس کے صدر کے چندر شیکھر راؤ (کے سی آر) نے اپنے دیرینہ ساتھی کے انتقال پر گہرے رنج و غم کا اظہار کرتے ہوئے تلنگانہ ریاستی تحریک میں ان کی خدمات کو یاد کیا اور ان کی سیاسی زندگی کو دیانت داری، خلوص اور عوامی خدمت کے لیے وقف قرار دیا۔

تلنگانہ کی پنچایت راج اور دیہی ترقی کی وزیر ڈاکٹر دانساری انسویا سیتکا نے بھی پیڈی سدرشن ریڈی کے انتقال پر افسوس کا اظہار کرتے ہوئے سوگوار خاندان سے تعزیت کی۔