مغربی بنگال اسمبلی کے سابق ڈپٹی اسپیکر بنرجی کی لاش پھندے سے لٹکی ملی

کولکاتا: مغربی بنگال اسمبلی کے سابق ڈپٹی اسپیکر اور بیربھوم کے رام پورہاٹ سے ترنمول کانگریس (ٹی ایم سی) کے سابق رکن اسمبلی آشیش بنرجی اتوار کو پارٹی دفتر میں پھانسی کے پھندے سے لٹکے ہوئے پائے گئے۔

پولیس نے رام پورہاٹ کے وارڈ پانچ میں ہتّلا پاڑہ واقع پارٹی دفتر سے ان کی لاش برآمد کی اور اسے پوسٹ مارٹم کے لیے بھیج دیا۔
ذرائع کے مطابق جائے وقوع سے ایک خودکشی کا نوٹ بھی ملا ہے۔

پولیس ان کی موت سے جڑے حالات اور نوٹ میں لکھی باتوں کی جانچ کر رہی ہے تاکہ یہ پتہ لگایا جا سکے کہ آیا بنرجی نے خودکشی کی تھی اور اگر ایسا ہے تو انہیں ایسا قدم اٹھانے کے لیے کس بات نے مجبور کیا۔

ٹی ایم سی کے سینئر رہنما بنرجی 2001 سے 2021 تک مسلسل رام پورہاٹ سے رکن اسمبلی منتخب ہوتے رہے تھے۔

پارٹی نے انہیں 2026 کے اسمبلی انتخابات میں میدان میں اتارا تھا، لیکن وہ بھارتیہ جنتا پارٹی (بی جے پی) کے امیدوار دھرو ساہا سے 24000 سے زیادہ ووٹوں سے ہار گئے تھے۔

انہوں نے ممتا بنرجی کی قیادت والی ٹی ایم سی حکومت کے دور اقتدار میں مغربی بنگال اسمبلی کے ڈپٹی اسپیکر کے طور پر کام کیا اور اسکولی تعلیم اور زراعت جیسے محکموں کی ذمہ داری سنبھالی۔

مسٹر بنرجی پارٹی کے سابق ضلع صدر انوبرت منڈل کے دور میں بیربھوم ٹی ایم سی کی سیاست سے وابستہ رہے تھے۔ انہیں رام پورہاٹ میں 2022 کے بوگتوئی قتل عام کے بعد سیاسی تفتیش کا بھی سامنا کرنا پڑا تھا۔

سال 2026 میں ریاست میں بی جے پی کے اقتدار میں آنے کے بعد وہ سیاست میں زیادہ سرگرم نظر نہیں آئے۔

ان کی موت ایسے وقت میں ہوئی ہے جب پارٹی میں سیاسی افراتفری کا دور چل رہا ہے۔ کئی سابق ارکان اسمبلی اور کونسلروں کے خلاف بدعنوانی کے الزامات کی وجہ سے کارروائی ہو رہی ہے اور پارٹی کا ایک دھڑا سابق وزیر اعلیٰ ممتا بنرجی اور پارٹی کے رہنما ابھیشیک بنرجی کی قیادت سے دور ہو رہا ہے۔

پولیس اب بنرجی کی موت کے حالات کی جانچ کر رہی ہے، جس میں مبینہ خودکشی کے نوٹ کی باتیں اور موت کی وجہ بننے والی کوئی بھی بات شامل ہے۔