تلنگانہ میں آبپاشی محکمہ کا اسسٹنٹ ایگزیکٹو انجینئر دو لاکھ روپے رشوت لیتے رنگے ہاتھوں گرفتار

حیدرآباد :  تلنگانہ انسدادِ بدعنوانی بیورو (اے سی بی) کے اہلکاروں نے بھدرادری کوتھاگوڈیم ضلع میں آبپاشی محکمہ کے ایک اسسٹنٹ ایگزیکٹو انجینئر کو مبینہ طور پر دو لاکھ روپے رشوت لیتے ہوئے رنگے ہاتھوں گرفتار کر لیا۔

انسدادِ بدعنوانی بیورو کی جانب سے منگل کو جاری بیان کے مطابق، اسواراوپیٹا آبپاشی سب ڈویژن-1 میں تعینات اسسٹنٹ ایگزیکٹو انجینئر لاچوبکتا سرینواس راؤ کو پیر کے روز جال بچھا کر اسواراوپیٹا میں واقع ڈپٹی ایگزیکٹو انجینئر کے دفتر سے گرفتار کیا گیا۔

بیان کے مطابق ملزم نے ایک شکایت کنندہ کے چچا کی زرعی زمین کے قریب واقع دونتھی کنٹا تالاب سے مٹی کھودنے اور اسے منتقل کرنے کی اجازت دینے کے عوض دو لاکھ روپے رشوت کا مطالبہ کیا تھا، جسے وہ وصول کرتے ہوئے پکڑا گیا۔

کارروائی کے دوران اے سی بی حکام نے ملزم کے قبضے سے رشوت کی پوری رقم بھی برآمد کر لی۔

بیورو نے الزام لگایا کہ سرینواس راؤ نے ناجائز فائدہ حاصل کرنے کے لیے اپنے سرکاری عہدے کا غلط استعمال کیا۔ گرفتار ملزم کو خصوصی عدالت میں پیش کیا جا رہا ہے۔