اولڈ سٹی میٹرو زیرِ تعمیر کاموں میں تیزی لانے کی ہدایت

حیدرآباد :  تلنگانہ کے وزیر اعلیٰ اے ریونت ریڈی نے منگل کو عہدیداروں کو ہدایت دی کہ حیدرآباد میٹرو ریل کے دوسرے مرحلے کے تحت اولڈ سٹی میٹرو کے کام میں تیزی لائی جائے اور مجوزہ کوریڈور کے لیے ٹینڈر کا عمل شروع کیا جائے۔

حیدرآباد میٹرو ریل لمیٹڈ (ایچ ایم آر ایل) کے حوالے سے منعقدہ اعلیٰ سطحی جائزہ اجلاس میں وزیر اعلیٰ نے عہدیداروں کو 7.5 کلومیٹر طویل ایم جی بی ایس-چندرائن گٹہ روٹ پر سڑک کو چوڑا کرنے کے کام میں تیزی لانے اور منصوبے کے لیے باقی ماندہ اراضی کے حصول کا عمل جلد از جلد مکمل کرنے کی ہدایت دی۔

انہوں نے عہدیداروں کو یہ بھی ہدایت دی کہ جدید ترین ٹیکنالوجی کے بارے میں دہلی میٹرو سے مشاورت کی جائے اور اولڈ سٹی میٹرو کوریڈور کے لیے ضروری تکنیکی رہنمائی حاصل کی جائے۔

حیدرآباد میٹرو میں بڑھتے ہوئے مسافروں کے دباؤ کا جائزہ لیتے ہوئے ریونت ریڈی نے عہدیداروں کو بھیڑ بھاڑ سے نمٹنے کے لیے اقدامات کرنے کی ہدایت دی۔ سرکاری بیان کے مطابق انہوں نے میٹرو ٹرینوں کے لیے اضافی کوچز خریدنے کی بھی ہدایت دی۔