پنت پر کپل دیو کا دلچسپ تبصرہ
حادثے کی وجہ سے ایک طویل عرصے کیلئے کرکٹ سے باہر ہونے والے ریشبھ پنت کی انجری اور ٹیم کامبی نیشن بگڑنے پر ورلڈکپ جیتنے والے عظیم کپتان کپیل دیو اس قدر برہم ہوئے کہ وہ یہاں تک کہہ گئے کہ جب پنت فٹ ہوکر آئیں گے تو وہ انہیں زوردار تھپڑ رسید کریں گے۔
ہندوستان اور آسٹریلیا کے درمیان بارڈر گاوسکر ٹرافی کا آغاز ہوا۔ ہوم گراؤنڈ کی بدولت ہندوستانی ٹیم کو سیریز کیلئے فیورٹ قرار دیا جا رہاہے۔ حادثے کی وجہ سے ایک طویل عرصے کیلئے کرکٹ سے باہر ہونے والے ریشبھ پنت کی انجری اور ٹیم کامبی نیشن بگڑنے پر ورلڈکپ جیتنے والے عظیم کپتان کپیل دیو اس قدر برہم ہوئے کہ وہ یہاں تک کہہ گئے کہ جب پنت فٹ ہوکر آئیں گے تو وہ انہیں زوردار تھپڑ رسید کریں گے۔
رپورٹ کے مطابق ٹی وی چینل پر آسٹریلیا سے سیریز کے حوالہ سے تبصرہ کرتے ہوئے کپل دیو نے کہاکہ میں ریشبھ پنت کو بہت پسند کرتا ہوں لیکن جب وہ فٹ ہو جائیں گے تو ان کو زرودار تھپڑ ماروں گا کیونکہ ان کی انجری کی وجہ سے آسٹریلیا کے خلاف ٹیم انڈیا کا کامبی نیشن بگڑ گیاہے۔
انہوں نے کہاکہ ہمیں ریشبھ پنت سے بہت پیار ہے اور ہم انہیں بہت پسند کرتے ہیں لیکن آج کل کے نوجوان جو غلطیاں کرتے ہیں اس میں بہت خطرہ ہے لہٰذا انہیں اپنا خیال رکھنا چاہیے۔ 25 سالہ وکٹ کیپر بلے باز گزشتہ سال اس وقت خطرناک کار حادثہ کا شکار ہوئے تھے جب وہ اپنی والدہ سے ملنے دہرادون جارہے تھے۔
گاڑی چلاتے ہوئے ان کی آنکھ لگ گئی تھی جس کے نتیجے میں ان کی گاڑی ہرِدوار کے قریب کنکریٹ کی دیواروں سے جا ٹکرائی تھی اور ان کی گاڑی آگ لگنے کے نتیجہ میں جل کر خاکستر ہوگئی تھی تاہم خوش قسمتی سے موقع پر موجود دو ٹرک ڈرائیورز نے انہیں بروقت گاڑی سے نکال لیا تھا۔
ریشبھ پنت کو ہسپتال سے تو ڈسچارج کردیا گیا ہے لیکن انہیں انجری سے بحال ہونے میں کم ازکم 6 ماہ لگ جائیں گے جس کی وجہ سے وہ اس سیریز کے ساتھ ساتھ ممکنہ طورپر ونڈے ورلڈکپ سے بھی باہر ہوگئے ہیں۔
جارح مزاج بلے باز وکٹ کیپنگ کے ساتھ ساتھ پانچویں نمبر پر تیزی سے بیٹنگ کرنے کیلئے شہرت رکھتے ہیں تاہم اب ان کی انجری کے سبب ٹیم کو ان کا درست متبادل تلاش کرنے میں مشکلات کا سامنا ہے۔ آسٹریلیا کے خلاف پہلے ٹسٹ میچ میں کے ایس بھرت کو پلیئنگ الیون میں موقع دیا گیاہے۔
