نئی دہلی: الیکشن کمیشن آف انڈیا (ای سی آئی) نے جمعرات کے روز لوک سبھا انتخابات 2024 کے چوتھے مرحلے کا نوٹیفکیشن جاری کیا۔ اس مرحلہ میں ملک کی 10 ریاستوں میں لوک سبھا انتخابات منعقد کئے جائیں گے۔
چوتھے مرحلے میں نو ریاستوں اور ایک مرکز کے زیر انتظام علاقہ پر مشتمل 96 لوک سبھا سیٹوں پر 13 مئی کو انتخابات ہوں گے۔
الیکشن کمیشن کے نوٹیفکیشن کے مطابق امیدوار 25 اپریل تک کاغذات نامزدگی داخل کر سکتے ہیں۔ لوک سبھا انتخابات کے تیسرے مرحلے کے لیے پرچہ نامزدگی داخل کرنے کی آخری تاریخ کل جمعہ کے روز ختم ہو جائے گی۔
تیسرے مرحلے میں 10 ریاستوں اور دو مرکز کے زیر انتظام علاقوں کی 94 پارلیمانی نشستوں پر 7 مئی کو ووٹ ڈالے جائیں گے۔
دریں اثناء پہلے مرحلے کی پولنگ کے لئے تیاریاں مکمل کرلی گئی ہیں۔ لوک سبھا انتخابات کی رائے دہی کا پہلے مرحلہ کے تحت کل یعنی جمعہ کو آغاز عمل میں آئے گا۔
پہلے مرحلے میں (19 اپریل جمعہ کو) 17 ریاستوں اور چار مرکز کے زیر انتظام علاقوں میں 102 لوک سبھا حلقوں میں ووٹنگ ہوگی۔
الیکشن کمیشن کے مطابق پہلے مرحلے میں 1,625 امیدوار میدان میں ہیں جن کی انتخابی مہم چہارشنبہ کی شام ختم ہوگئی۔
پہلے مرحلے میں اروناچل پردیش، میگھالیہ، میزورم، ناگالینڈ، سکم، انڈمان اور نکوبار جزائر، لکشدیپ، پڈوچیری، اتراکھنڈ اور تامل ناڈو کے تمام پارلیمانی حلقوں میں پولنگ ہوگی۔
راجستھان کی 12 سیٹوں، اتر پردیش کی آٹھ سیٹوں، مدھیہ پردیش کی چھ سیٹوں، آسام اور مہاراشٹر کی پانچ پانچ سیٹوں، بہار کی چار سیٹوں، مغربی بنگال کی تین سیٹوں، منی پور کی دو سیٹوں اور چھتیس گڑھ، تریپورہ اور جموں و کشمیر میں سے ہر ایک کی ایک سیٹ کے لئے بھی ووٹنگ ہوگی۔
لوک سبھا انتخابات کے پہلے مرحلے کے لئے ووٹنگ کے علاوہ جمعہ کے روز ایک ہی مرحلے میں اروناچل پردیش اور سکم میں اسمبلیوں کے انتخاب کے لئے بھی پولنگ ہوگی۔
