راجہ سنگھ کا تلنگانہ بی جے پی قائدین کو گروہی سیاست ختم کرنے کا مشورہ

حیدرآباد: بی جے پی کے رکن اسمبلی راجہ سنگھ نے تلنگانہ بی جے پی میں جاری گروہی سیاست پر تشویش کا اظہار کرتے ہوئے پارٹی قائدین کو اپنے طرز عمل میں تبدیلی لانے اور متحد ہو کر کام کرنے کا مشورہ دیا ہے۔

راجہ سنگھ نے کہا کہ تلنگانہ بی جے پی میں جب بھی گروہی اختلافات پیدا ہوتے ہیں تو قائدین اپنی شکایات لے کر دہلی پہنچ جاتے ہیں۔ ان کے مطابق، پارٹی کے اندر جاری اختلافات اور گروہ بندی کا اثر تلنگانہ کے قائدین کی قومی سطح پر نمائندگی پر بھی پڑا ہے۔

انہوں نے دعویٰ کیا کہ تلنگانہ کے بی جے پی قائدین کو پارٹی کی قومی عاملہ میں جگہ نہ ملنے کی ایک بڑی وجہ ریاستی یونٹ میں جاری اندرونی اختلافات اور گروہی سیاست ہے۔

راجہ سنگھ نے تلنگانہ بی جے پی کے قائدین سے اپیل کی کہ وہ آپسی اختلافات کو ختم کرتے ہوئے پارٹی کو مضبوط بنانے کے لیے متحد ہو کر کام کریں۔

انہوں نے کہا، "ہر بار تلنگانہ بی جے پی میں گروہی سیاست ہوتی ہے اور قائدین اپنی شکایات لے کر دہلی جاتے ہیں۔ اب بھی تلنگانہ کے بی جے پی قائدین کو اپنا رویہ بدلنا چاہیے۔”