سعودی ولی عہد محمد بن سلمان کی ہدایت پر 70 برس قدیم مسجد کی تعمیر نو

ریاض: سعودی ولی عہد شہزادہ محمد بن سلمان ریاض میں واقع 70 برس قدیم الروسا مسجد کی توسیع کروائیں گے، ولی عہد ملک بھر کی تاریخی مساجد کی تعمیر نو کروا رہے ہیں۔

سعودی ولی عہد شہزادہ محمد بن سلمان ریاض کی المجمعہ کمشنری کی الروسا مسجد کی توسیع کروائیں گے۔ امیر محمد بن سلمان مملکت بھر میں تاریخی مساجد کے احیا، تجدید، توسیع اور اصلاح و مرمت کا منصوبہ نافذ کروا رہے ہیں، پہلے مرحلے میں 10 علاقوں کی 30 مساجد پر کام مکمل کر لیا گیا ہے۔

ااب دوسرے مرحلے میں 13 علاقوں کی 30 مساجد کو شامل کیا گیا ہے، ان میں ریاض ریجن کی 6 مساجد شامل ہیں۔ الروسا مسجد ان میں سے ایک ہے۔ الروسا مسجد 70 برس قبل تعمیر کی گئی تھی، یہ جبل منیخ کے مغربی دامن میں واقع ہے، یہ نجدی طرز تعمیر پر 1365 سے 1370 ہجری کے دوران بنائی گئی تھی۔

امیر محمد بن سلمان اس کے رقبے میں توسیع کروائیں گے، اس وقت اس کا رقبہ 663 مربع میٹر ہے جو توسیع کے بعد 705 مربع میٹر ہو جائے گا۔ توسیع کے بعد نمازیوں کی گنجائش 210 تک ہو جائے گی، تعمیر و توسیع مقامی تعمیراتی سامان، مٹی اور گارے سے کی جائے گی۔