یوکرین میں بھارتی گروپ کے فارما پلانٹ پر روسی ڈرون حملہ، ایک شخص ہلاک، کئی زخمی

کیف : یوکرین کے سومی شہر میں بھارت کے کسوم گروپ کی ملکیت والے ایک فارما پلانٹ کو روسی ڈرون حملوں میں نقصان پہنچا، جس کے نتیجے میں ایک شخص ہلاک اور کئی دیگر زخمی ہوگئے۔ میڈیا رپورٹس کے مطابق حملے میں فارما پلانٹ کا مرکزی ڈھانچہ تباہ ہوگیا ہے۔

این ڈی ٹی وی کی رپورٹ کے مطابق سومی میں واقع فارما پلانٹ کی مرکزی عمارت روسی ڈرون حملے میں تباہ ہوگئی۔ حکام نے بتایا کہ ہلاکتوں اور زخمیوں کی تعداد میں تبدیلی ہوسکتی ہے۔

روسی ڈرون حملے مسلسل چوتھے روز بھی جاری رہے، جن میں یوکرین کے مختلف علاقوں میں متعدد عمارتوں اور اہم تنصیبات کو نقصان پہنچا یا تباہ کردیا گیا، جن میں کیف کے اہم پل بھی شامل ہیں۔

اتوار کو ہونے والے ڈرون اور میزائل حملوں کے دوران جرمن چانسلر فریڈرک مرز کے کیف کے اچانک دورے کا پس منظر بھی اہم رہا۔ انہوں نے یوکرین کے ساتھ اظہار یکجہتی کرتے ہوئے 1.3 ارب یورو کے امدادی پیکیج کا اعلان کیا۔

اطلاعات کے مطابق بھارتی فارما پلانٹ پر آج حملہ اس وقت ہوا جب شہر بھر میں صبح سے ہی فضائی حملے کے سائرن مسلسل بج رہے تھے۔ جائے وقوعہ سے سامنے آنے والی تصاویر میں ڈرون حملے کے بعد پلانٹ سے دھوئیں کا ایک بڑا بادل اٹھتا ہوا دکھائی دیا۔

رپورٹس کے مطابق کسوم گروپ نے 1994 میں یوکرین میں بھارتی ادویات کے ڈسٹری بیوٹر کے طور پر کام شروع کیا تھا اور اس وقت اس کی سربراہی بھارتی شہری راجیو گپتا کررہے ہیں۔ 2002 میں کمپنی نے دیگر اداروں کی ادویات کی تقسیم کا کام بند کرکے اپنی مصنوعات کی مارکیٹنگ شروع کردی۔

بعد ازاں کمپنی نے ادویات کی تیاری کے شعبے میں قدم رکھا اور 2007 میں بھارت میں اپنا پلانٹ قائم کیا، جبکہ 2009 میں یوکرین کے شہر سومی میں اپنا فارما پلانٹ قائم کیا۔

فارما گروپ 50 سے زائد جنیرک ادویات تیار کرتا ہے اور انہیں یوکرین، ازبکستان، قازقستان اور فلپائن سمیت دنیا کے مختلف ممالک میں فروخت کرتا ہے۔

یوکرین کے صدر وولودیمیر زیلنسکی نے کیف میں پِوِنچنی پل اور سومی میں فارماسیوٹیکل گودام پر روسی حملوں کی مذمت کی۔ انہوں نے بتایا کہ حملے میں ایک شخص ہلاک ہوا اور متوفی کے اہل خانہ سے تعزیت کا اظہار کیا۔

زیلنسکی نے ایکس پر اپنی پوسٹ میں کہا، ’’آج صبح روسیوں نے ایک بار پھر کیف کے پِوِنچنی پل کو ڈرون سے نشانہ بنایا۔ انہوں نے سومی میں ایک عام فارماسیوٹیکل گودام پر بھی ڈرون سے حملہ کیا۔ افسوسناک طور پر ایک شخص ہلاک ہوگیا۔ میں اس کے اہل خانہ اور عزیزوں سے تعزیت کرتا ہوں۔‘‘

انہوں نے مزید بتایا کہ دنیپرو میں ایک مواصلاتی تنصیب کو بھی نشانہ بنایا گیا، جس کے نتیجے میں چھ افراد زخمی ہوئے۔

زیلنسکی کے مطابق روس نے رات بھر یوکرین کے خلاف 135 حملہ آور ڈرونز لانچ کیے، جن میں 50 سے زیادہ جیٹ انجن سے چلنے والے ڈرونز شامل تھے۔ خارکیف، کیف، دنیپرو، دونیتسک، سومی اور زاپوریژیا کے علاقے حملوں کی زد میں آئے۔

انہوں نے عالمی برادری پر زور دیا کہ روس کو اس بڑھتی ہوئی جارحیت کے لیے جواب دہ ٹھہرایا جائے۔