سونیا گاندھی، تلنگانہ کی کسی لوک سبھا نشست سے مقابلہ کرسکتی ہیں؟

حیدرآباد: کانگریس کی سیاسی امور کمیٹی نے کانگریس کی سینئر لیڈر سونیا گاندھی پر زور دیا ہے کہ وہ اس بار تلنگانہ سے انتخابات میں حصہ لیں۔ کمیٹی نے آج حیدرآباد میں منعقدہ اجلاس میں اس سلسلے میں ایک متفقہ قرارداد منظور کی۔

کمیٹی کے اجلاس اور فیصلوں کے بارے میں میڈیا کو تفصیلات سے واقف کرواتے ہوئے سینئر لیڈر محمد علی شبیر نے کہا کہ اجلاس کے دوران تین قراردادیں منظور کی گئیں جن میں کانگریس کو تلنگانہ میں منتخب کرنے کے لئے عوام کا شکریہ ادا کرنا اور پارٹی کے قومی رہنماؤں سے اظہار تشکر شامل ہے۔

اس بات کا ذکر کرتے ہوئے کہ اندرا گاندھی کو میدک سے منتخب کیا گیا تھا، شبیر علی نے کہا کہ ریاست کے عوام سونیا گاندھی کا شکریہ ادا کرنا چاہتے ہیں کیونکہ انہوں نے تلنگانہ کو ریاست کا درجہ دیا تھا ۔

انہوں نے کہا کہ اجلاس میں 6 ضمانتوں پر تبادلہ خیال کیا گیا اور وزیراعلی ریونت ریڈی اسمبلی میں دیگر ضمانتوں کے بارے میں بیان دیں گے۔ انہوں نے کہا کہ 28 دسمبر کو ناگاپور میں منعقد ہونے والے پارٹی کے یوم تاسیس میں ریاست سے 50 ہزار افراد کی شرکت کا امکان ہے۔

انہوں نے مزید کہا کہ نائب وزیر اعلی بھٹی وکرامارکا نےریاست کی معاشی صورتحال کی تفصیلات سے واقف کروایا جبکہ اتم کمار ریڈی نے آبپاشی کے شعبے کے حالات کے بارے میں تفصیلات سے واقف کروایا۔

انہوں نے کہا کہ پارٹی عوام کو بجلی، فائنانس، آبپاشی کے پراجکٹس میں ہوئے کرپشن کی تفصیلات سے واقف کروائے گی۔ یہ کہتے ہوئے کہ اجلاس میں ہر گاؤں میں اس مہینے کی 28 تاریخ سے گرام سبھا منعقد کرنے کا فیصلہ کیا گیا ہے، انہوں نے انکشاف کیا کہ اسی دن سے راشن کارڈز کے لئے درخواستیں وصول کی جائیں گی۔ انہوں نے کہا کہ وزراء کو پارلیمانی حلقوں کے انچارج کے طور پر ذمہ داریاں سونپی گئی ہیں۔ انہوں نے مزید کہا کہ وزیر اعلیٰ نے بتایا کہ نامزد عہدوں کو جلد پر کیا جائے گا۔