حیدرآباد میں صبح سے ہی جھلسادینے والی گرمی، عوام پریشان

حیدرآباد: شہرحیدرآباد میں جمعہ کے روز صبح سے ہی درجہ حرارت میں تیزی سے اضافہ ہوا۔ 11 بجے دن کے قریب جھلسادینے والی گرمی شروع ہوگئی۔

ویدرمانیٹرنگ اسٹیشنوں کی رپورٹ کے مطابق شہر کے مختلف مقامات پر صبح کے وسط میں اعظم ترین درجہ حرارت 42 ڈگری سلسیس ریکارڈکیاگیا۔میاں پور‘ شہرکا گرم مقام رہا جہاں درجہ حرارت 42.7 ڈگری سلسیس درج کیاگیا۔

بورا بنڈہ میں 42.5‘شیخ پیٹ میں 42.4‘ بالاجی نگر کوکٹ پلی اور آدرش نگر قطب اللہ پور میں 42.4 اور یونیورسٹی آف حیدرآباد علاقہ میں اعظم ترین درجہ حرارت 42ڈگری سلسیس درج کیاگیا۔رات 10بجے تک بھی شہر میں لوچل رہی تھی۔

شدید گرمی سے عوام بے حال دیکھے گئے۔ محکمہ موسمیات نے پیش قیاسی کی ہے کہ آئندہ 5دنوں کے دوران تلنگانہ میں گرمی میں اضافہ کا امکان ہے۔محکمہ موسمیات نے پیش قیاسی کی ہے تلنگانہ میں کہیں کہیں مئی کے پہلے ہفتہ تک گرمی کی شدید برقرار رہے گی۔ریاست اور شہر میں آج درجہ حرارت معمول سے زائد ریکاڈ کیا گیا۔

اضلاع میں اعظم ترین درجہ حرارت 45ڈگری سلسیس درج کیاگیا جبکہ شہر میں درجہ حرارت 44ڈگری کے قریب ریکاڈکیا گیا۔

ریاست کے کئی مقامات پر جمعہ کے روز شدید گرمی ہوئی۔ضلع کریم نگر کا جمی کنٹہ ریاست کا گرم مقام رہا جہاں اعظم ترین درجہ حرارت 45.6ڈگری درج کیا گیا۔ضلع نلگنڈہ کے ندامانوراور منتھنی(پداپلی ضلع) میں درجہ حرارت 45.2ڈگری سلسیس ریکاڈ کیاگیا۔

محکمہ صحت کے حکام نے عوام پر زور دیا ہے کہ وہ 11بجے دن سے 4بجے شام تک گھروں سے غیر ضروری باہرنہ نکلیں‘ سن اسٹروک سے محفوظ رہنے کے لئے احتیاطی تدابیر اختیار کریں۔