تلنگانہ بی جے پی کی وجئے سنکلپ یاترا کاآغاز

حیدرآباد: تلنگانہ بی جے پی کی وجئے سنکلپ یاترا کاآغازہوا۔ریاست میں لوک سبھا کی زیادہ سے زیادہ نشستوں پر کامیابی کے مقصد کے ساتھ اس یاترا کاآغازکیاگیا۔

نارائن پیٹ ضلع میں بی جے پی تلنگانہ یونٹ کے سربراہ و مرکزی وزیر سیاحت کشن ریڈی نے اس یاترا کاآغاز کیا۔یاترا کے لئے پارٹی نے ریاست کو پانچ کلسٹرس میں تقسیم کیا ہے۔

17پارلیمانی حلقوں، 114اسمبلی حلقوں کے 5500کلومیٹر کا یہ یاترا احاطہ کرے گی۔یاترا کے دوران 106جلسے، 102روڈ شوز اور دیگر پروگرام منعقد کئے جائیں گے۔

2مارچ کو اس یاترا کااختتام عمل میں آئے گا۔مرکزمیں مودی حکومت کو تیسری معیاد کے لئے منتخب کرنے کیلئے یہ یاترانکالی جارہی ہے۔

دس روزہ یاترا کے دوران پارٹی کے سینئر قومی لیڈران،مرکزی وزراء اور این ڈی اے کی مختلف ریاستوں کے وزرائے اعلیٰ سرگرمی سے حصہ لیں گے۔

یاترا کے دوران، پارٹی کے رہنما اور کارکنان عوام سے ملاقات کریں گے تاکہ ہندوستان کو حقیقی معنوں میں خود مکتفی بنانے اور وشو گرو کے طور پر اس کی قدیم شان کو بحال کرنے میں نریندر مودی کی کوششوں کی اہمیت پر زور دیا جا سکے۔