تالابوں، نہروں پرقابض افراد دستبردارہوجائیں، ورنہ حیدرامکانات کومنہدم کردے گی

حیدرآباد: وزیراعلی تلنگانہ ریونت ریڈی نے اعلان کیا کہ ریاست کے مختلف محکموں اور شعبوں میں اس سال کے اواخرتک 35 ہزار سے زیادہ ملازمتوں کو پُرکیاجائے گا اور تقرری کے دستاویزات حوالے کئے جائیں گے۔

وزیراعلی نے آج صبح تلنگانہ اسٹیٹ پولیس اکیڈیمی میں ٹریننگ مکمل کرنے والے سب انسپکٹرس، ریزروڈ پولیس اور اے ایس آئیز کی پاسنگ آؤٹ پریڈ کا جائزہ لیا۔

انہوں نے پولیس کے پریڈ کی سلامی لی۔اکیڈمی میں 547سب انسپکٹرس کی پاسنگ آوٹ پریڈ ہوئی۔145خواتین سمیت 547سب انسپکٹرس کی تربیت کی تکمیل کے بعد یہ پریڈمنعقد کی گئی۔

تقریب سے خطاب کرتے ہوئے وزیر اعلیٰ نے انہیں یاد دلایا کہ ریاست میں کانگریس حکومت کے بننے کے اندرون 90دن 30,000 نوجوانوں کو تقررات کے دستاویزات حوالے کئے گئے۔

انہوں نے کہا کہ عوام کی منتخب حکومت ہمیشہ عوامی خدمت میں رہے گی۔ انہوں نے اس یقین کااظہار کیا کہ تربیت مکمل کرنے والے پولیس عہدیدار ریاست میں منشیات، گانجہ اور سائبر جرائم کو آہنی پنجہ سے روکنے میں کامیاب ہوں گے۔

انہوں نے کہا کہ ریاست کی تعمیر نو اور آنے والی نسلوں کے لیے اسے سنہری بنانا ہر ایک کی ذمہ داری ہے۔ وزیراعلیٰ نے واضح کیا کہ جن افرادنے تالابوں، نہروں پر قبضہ کر رکھا ہے خواہ وہ کتنے ہی بڑے کیوں نہ ہوں وہ خود ہی اس سے دستبردارہوجائیں بصورت دیگرحیدرآبادڈیزاسٹررسپانس اینڈ ایسیٹ مانیٹرنگ اینڈ پروٹکشن (حیدرا) اس کومنہدم کردے گی۔

وزیراعلیٰ نے کہا کہ تالابوں اور نہروں پر غیر مجاز قبضے سیلاب کی وجہ ہیں، وزیراعلیٰ نے واضح کیا کہ جو غیر مجاز تعمیرات کئی علاقوں میں سیلاب کا باعث بن رہی ہیں ان کو نظرانداز نہیں کیا جا سکتا۔

تلنگانہ کے سماج کو بہتر پولیس خدمات فراہم کرنے کے لئے انہوں نے متاثرین کے ساتھ دوستانہ پولیسنگ کرنے اور مجرموں کے ساتھ سختی سے نمٹنے کی ہدایت دی۔

وزیر اعلیٰ نے کہا کہ ریاست میں امن و سلامتی کے ساتھ نوجوانوں کے لیے سرمایہ کاری اور روزگار کے مواقع آئیں گے۔ وزیراعلی جنہوں نے کہا کہ عوامی فلاح و بہبود ان کی ترجیح ہے، نشاندہی کی کہ انہوں نے کافی کم وقت میں کسانوں کے 18 ہزار کروڑ روپے کے فصل کے قرضہ جات معاف کئے ہیں۔

اس موقع پر سیلاب زدگان کے لئے پولیس کی جانب سے 11.06کروڑروپئے کا عطیہ دیاگیا۔یہ چیک وزیراعلی ریونت ریڈی کو ڈی جی پی جیتندرنے حوالے کیا۔