محکمہ موسمیات نے ممبئی میں بھاری بارش اور تیز ہواؤں کی وارننگ دی

ممبئی: محکمہ موسمیات نے ہفتہ کو ممبئی شہر اور مضافات میں مسلسل بارش کا امکان ظاہر کیا ہے۔ کچھ مقامات پر بھاری سے بہت بھاری بارش اور کچھ الگ تھلگ علاقوں میں بہت زیادہ بارش ہونے کا امکان ہے۔

محکمہ موسمیات نے دن کے وقت 50-60 کلومیٹر فی گھنٹہ کی رفتار سے تیز ہوائیں چلنے کی بھی وارننگ دی ہے۔ جمعہ کی صبح 8 بجے سے ہفتہ کی صبح 8 بجے کے درمیان درج بارش کے اعداد و شمار کے مطابق، شہر میں 99 ملی میٹر بارش ہوئی۔ مشرقی مضافات میں 98 ملی میٹر اور مغربی مضافات میں 94 ملی میٹر بارش درج کی گئی۔

حکام نے ہفتہ کو جوار بھاٹے کا وقت بھی جاری کیا ہے۔ دوپہر 2 بج کر 50 منٹ پر 4.26 میٹر اونچے جوار (ہائی ٹائیڈ) کی امید ہے اور رات 8 بج کر 56 منٹ پر 1.66 میٹر کم جوار (لو ٹائیڈ) آنے کا امکان ہے۔

حکام نے ممبئی کے لوگوں کو مشورہ دیا ہے کہ وہ بھاری بارش اور اونچے جوار کے ایک ساتھ ہونے کی وجہ سے نچلے اور پانی جمع ہونے والے علاقوں میں احتیاط برتیں۔