ٹینک بنڈ پر سالگرہ کی تقریب کے دوران المناک حادثہ، 6 سالہ بچی اور رشتہ دار ہلاک

حیدرآباد: ٹینک بنڈ پر سالگرہ منانے کی خوشیاں اس وقت ماتم میں تبدیل ہوگئیں جب سڑک عبور کرنے کے دوران تیز رفتار لاری کی زد میں آکر 6 سالہ بچی اور اس کا رشتہ دار جاں بحق ہوگئے۔

تفصیلات کے مطابق میڈچل ضلع کے اولڈ الوال، جونا بندہ علاقے میں سائی ناتھ اور اشونی اپنی دو بیٹیوں شرانیہ (9) اور ساراکشی (6) کے ساتھ مقیم ہیں اور می سیوا خدمات انجام دیتے ہیں۔

اسی می سیوا مرکز میں 40 سالہ وشوانت اور ان کی اہلیہ سندھو بھی کام کرتے ہیں۔ دونوں کی شادی تقریباً تین ماہ قبل ہوئی تھی۔

بتایا گیا ہے کہ ساراکشی کی سالگرہ کے موقع پر اہل خانہ اور رشتہ داروں نے سیکنڈ شو فلم دیکھی، جس کے بعد وہ سالگرہ کا کیک کاٹنے کے لیے ٹینک بنڈ پہنچے۔

کیک کاٹنے کے بعد سڑک عبور کرتے ہوئے سکندرآباد کی سمت سے تیز رفتاری سے آنے والی ایک لاری نے ساراکشی اور وشوانت کو ٹکر مار دی۔

حادثے میں 6 سالہ ساراکشی شدید زخمی ہوگئی اور موقع پر ہی دم توڑ گئی۔ وشوانت کو شدید زخمی حالت میں ہسپتال منتقل کیا گیا، جہاں دوران علاج وہ بھی زخموں کی تاب نہ لاتے ہوئے چل بسے۔

اس افسوسناک حادثے کے بعد دونوں خاندانوں میں غم کی لہر دوڑ گئی ہے۔ پولیس نے واقعہ کی تحقیقات شروع کردی ہیں اور حادثے کی وجوہات کا پتہ لگایا جا رہا ہے۔