یکساں سیول کوڈ سے ہندوؤں کا کوئی فائدہ نہیں ہوگا: ممتا بنرجی

جنگی پور(مغربی بنگال): چیف منسٹر مغربی بنگال ممتا بنرجی نے الیکشن سے قبل یکساں سیول کوڈ(یو سی سی) کو سیاسی حربہ کے طورپر استعمال کرنے پر بی جے پی کو نشانہ ئ تنقید بنایا۔

انہوں نے زور دے کر کہا کہ ہندوؤں کو اس سے کوئی فائدہ نہیں ہوگا۔ پیر کے دن ضلع مرشدآباد کے اقلیتی غلبہ والے جنگی پور حلقہ میں ریالی سے خطاب میں انہوں نے بی جے پی پر الزام عائد کیا کہ وہ الیکشن کے ابتدائی مرحلوں میں شکست ہوتی دیکھ‘ پھوٹ ڈالنے کے حربوں پر اترآئی ہے۔

انہوں نے کہا کہ جب بھی الیکشن ہوتا ہے بی جے پی والے فرقہ وارانہ کشیدگی بھڑکانے کے لئے کوئی نہ کوئی مسئلہ استعمال کرتے ہیں۔ اِس بار یہ لوگ یکساں سیول کوڈ کی بات کررہے ہیں اور اسے ایک مخصوص فرقہ کے خلاف بتارہے ہیں لیکن یکساں سیول کوڈ سیاسی شورشرابہ کے سوا کچھ بھی نہیں ہے۔

ہندوؤں کو اس سے کوئی فائدہ ہونے والا نہیں ہے۔ ممتا بنرجی نے کہا کہ ملک بھر میں بی جے پی مخالف جذبات زوروں پر ہیں۔ لوک سبھا الیکشن کے پہلے اور دوسرے مرحلہ سے یہ بات ظاہر ہوچکی ہے۔ ابتدائی دو مرحلوں میں ووٹنگ کے انداز اور تناسب کو دیکھ کر ہم پورے اعتماد کے ساتھ کہہ سکتے ہیں کہ بی جے پی ہار رہی ہے۔

مابقی 5مرحلوں میں بھی اسے شکست کا سامنا کرنا پڑے گا۔ بی جے پی میں خوف اور افراتفری مچی ہے۔ انہوں نے خبردار کیا کہ کانگریس اور سی پی آئی ایم کو ودٹ نہ دیں کیونکہ یہ دونوں جماعتیں ان کے بقول بنگال میں بی جے پی کی ایجنٹس ہیں۔