یوپی میں روٹی پر تھوکنے کا ویڈیو وائرل، ہوٹل مالک گرفتار (ویڈیو وائرل)
ضلع سہارنپور کے ایک دھابہ/ ہوٹل میں روٹی کی تیاری کے دوران ایک نوجوان کے اس پر تھوکنے کا ویڈیو سوشل میڈیا پر وائرل ہوگیا ہے جس کے نتیجہ میں دھابہ کے مالک کو گرفتار کرلیا گیا ہے۔
سہارنپور(یوپی): ضلع سہارنپور کے ایک دھابہ/ ہوٹل میں روٹی کی تیاری کے دوران ایک نوجوان کے اس پر تھوکنے کا ویڈیو سوشل میڈیا پر وائرل ہوگیا ہے جس کے نتیجہ میں دھابہ کے مالک کو گرفتار کرلیا گیا ہے۔
پولیس نے بتایا کہ اس واقعہ میں ملوث نابالغ ملازم کو بھی حراست میں لے لیا گیا ہے۔ سوشل میڈیا پر ویڈیو کے گشت کرنے کے ساتھ ہی مقامی پولیس اسٹیشن میں ہوٹل کے مالک عثمان کے خلاف شکایت درج کرائی گئی۔
فتح پور پولیس اسٹیشن کے حدود میں چھٹمال پور ٹاؤن کے گراس مارکٹ کے قریب واقع ہوٹل ”دسترخوان“ میں یہ واقعہ پیش آیا۔ ہوٹل کے نابالغ ملازم کو روٹی تیار کرنے کے دوران اس پر تھوکتے ہوئے دکھایا گیا اور اس ویڈیو کو سوشل میڈیا پر گشت کرایا گیا۔
سپرنٹنڈنٹ پولیس (رورل) ساگر جین نے یہ بات بتائی۔ شکایت گزار نتیش برتھوال نے الزام لگایا کہ ہوٹل کے ملازم کی حرکتیں جارحانہ اور ان کی برادری کے مذہبی جذبات کو ٹھیس پہنچانے والی ہیں۔
شکایت گزار نے ہوٹل کے خلاف کارروائی کرنے اور اسے بند کردینے کی درخواست کی۔ ایس پی نے کہا کہ پولیس نے ایک کیس درج کرلیا ہے‘ ہوٹل مالک کو گرفتار کرلیا گیا ہے جبکہ نابالغ ملازم کو حراست میں لے لیا گیا ہے۔
