تلنگانہ عوام کا موڈ بی جے پی کی طرف:امیت شاہ

حیدرآباد: مرکزی وزیر داخلہ امیت شاہ نے کہاکہ تلنگانہ عوام کا موڈ بی جے پی کی طرف ہے۔

آج گوا میں 2024 میں منعقد شدنی پارلیمنٹ انتخابات کے متعلق گفتگو کرتے ہوئے انہوں نے کہاکہ انہیں صاف محسوس ہورہاہے کہ ریاست تلنگانہ کے عوام کی مکمل تائید بی جے پی کے ساتھ ہے۔

امیت شاہ کی جانب سے تلنگانہ کے عوام کے نظریات کو اجاگر کرنا اس بات کی طرف واضح اشارہ ہے کہ بی جے پی تلنگانہ پر کتنی توجہ مرکوز کررکھی ہے۔ اس موقع پر خطاب کرتے ہوئے امیت شاہ نے کہاکہ سروے رپورٹس کے مطابق تلنگانہ عوام کا موڈ بی جے پی کی طرف ہے۔

اڈیشہ میں بھی حالات میں تبدیلی کا امکان ہے عوام کی رائے بی جے پی کی طرف مائل ہے۔ انہوں نے کہاکہ آئندہ ماہ کرناٹک کے اسمبلی انتخابات میں بی جے پی دوبارہ کامیابی حاصل کرتے ہوئے اقتدار حاصل کرے گی۔

کانگریس پر تنقید کرتے ہوئے انہوں نے کہاکہ کانگریس اقلیتوں کو ووٹ بینک تصور کرتے ہوئے ان پر انحصار کررہی ہے مگر ان کی ترقی‘خوشحالی اور تحفظ کو نظر انداز کردیاگیا۔

ان کااشارہ شمال مشرق ریاستوں کی طرف تھا جہاں عیسائیوں کی اکثریت ہے اور وہ عموماًکانگریس کے حامی بتائے جاتے ہیں۔