مشرق وسطیٰ

سعودی عرب میں خوفناک سڑک حادثہ، خوش قسمت نوجوان بچ گئے

سعودی عرب میں خوفناک ٹریفک حادثے کے دوران گاڑی میں موجود 2 نوجوان خوش قسمتی سے بال بال بچ گئے۔

ریاض: سعودی عرب میں خوفناک ٹریفک حادثے کے دوران گاڑی میں موجود 2 نوجوان خوش قسمتی سے بال بال بچ گئے۔

اردو نیوز کے مطابق سعودی عرب کے عسیر ریجن میں برجال المع علاقے میں خوفناک ٹریفک حادثے میں 2 نوجوان یقینی موت سے بچ گئے۔

واقعہ تیز رفتاری کے باعث پیش آیا، ڈرائیونگ سیٹ پر بیٹھا نوجوان تیز رفتار سے گاڑی چلا رہا تھا جس کے دوران گاڑی کنٹرول سے باہر ہو کر انڈر پاس کے پلر سے ٹکرا گئی۔

حادثہ اس قدر شدید تھا کہ گاڑی تباہ ہوگئی، حادثے سے متاثرہ گاڑی دیکھ کر یقین تھا کہ اس میں سوار افراد زندہ نہیں بچے ہوں گے تاہم دونوں نوجوان محفوظ رہے۔

خیال رہے کہ سعودی عرب میں محکمہ ٹریفک کی طرف سے بارہا یہ ہدایت کی جاتی ہے کہ حد سے زیادہ رفتار سے ڈرائیونگ سے گریز کیا جائے کیونکہ بیشتر ٹریفک حادثات تیز رفتاری کے باعث پیش آرہے ہیں۔