آندھراپردیش میں آرٹی سی بس اورلاری میں تصادم،2 افراد ہلاک

حیدرآباد: آرٹی سی بس اورلاری میں تصادم کے نتیجہ میں دو افراد ہلاک اور بعض دیگرزخمی ہوگئے۔یہ حادثہ آندھراپردیش کے ضلع نیلور میں پیش آیا۔تفصیلات کے مطابق ضلع کے موچرلہ کے قریب تلنگانہ کی آرٹی سی بس اور لاری میں تصادم ہوگیا۔

اس حادثہ میں بس کے سامنے کے حصہ کو شدید طورپر نقصان پہنچا۔حادثہ اتناشدید تھا کہ ڈرائیور جس کی شناخت 45سالہ ونود کے طورپر کی گئی ہے،موقع پر ہی ہلاک ہوگیا اور بس کے سات مسافرین زخمی ہوگئے جن کو علاج کیلئے کاوالی سرکاری اسپتال منتقل کیاگیاجہاں سے بہتر علاج کیلئے ان کو نیلور منتقل کیاگیا۔

ان زخمیوں میں ایک 65سالہ ضعیف شخص کی علاج کے دوران موت ہوگئی۔اطلاع ملتے ہی پولیس وہاں پہنچی جس نے صورتحال کا جائزہ لیا اور ایک معاملہ درج کرلیا۔تلنگانہ آرٹی سی کی بس مریال گوڑہ سے تروپتی کی سمت جارہی تھی کہ یہ حادثہ پیش آیا۔حادثہ کے وقت بس میں 30مسافرین سوار تھے۔