آیا صوفیہ میں روسی سیاح نے اسلام قبول کرلیا

انقرہ: استنبول کی تاریخی مسجد آیا صوفیہ میں روسی سیاح نے اسلام قبول کرلیا جس کی ویڈیو سوشل میڈیا پر وائرل ہوگئی۔

سماجی رابطے کی ویب سائٹ ٹوئٹر پر ترک میڈیا کی جانب سے مسجد آیا صوفیہ میں روسی سیاح کے کلمہ شہادت پڑھ کر دائرہ اسلام میں داخل ہونے کی ویڈیو شیئر کی گئی ہے۔

ویڈیو میں سیرو سیاحت کی غرض سے آئے روسی سیاح کو کلمہ پڑھ کر اللہ کی وحدانیت اور نبی پاک ﷺ کے آخری رسول ہونے پر ایمان لاتے دیکھا جاسکتا ہے۔

ویڈیو کے کیپشن کے ذریعے بتایا گیا ہے کہ دائرہ اسلام میں داخل ہونے والے روسی سیاح کا اسلامی نام ’احمد دنیز‘ رکھا گیا ہے۔

احمد دنیز سیرو سیاحت کی غرض سے آیا صوفیہ آئے تھے جب مسجد میں امام، صحیح بخاری کا درس دے رہے تھے، روسی سیاح نے درس سننے کے بعد امام کے ہاتھ پر کلمہ پڑھتے ہوئے اسلام قبول کرلیا۔

روسی سیاح احمد نے کہا ہے کہ میں یہاں سیر کی غرض سے آیا تھا لیکن یہاں آکر جب درس سنا تو اسلام قبول کرنے کی خواہش پیدا ہو گئی، میں نے اسلامی تعلیمات سے متاثر ہو کر اسلام قبول کیا ہے۔