چہل قدمی کے دوران حرکت قلب بند ہونے سے نوجوان کی موت

وشاکھا پٹنم: حرکت قلب اچانک بند ہونے سے ایک نوجوان کی موت کا ایک اور واقعہ پیش آیا جس میں ایک 28 سالہ نوجوان، صبح کی چہل قدمی کے دوران اچانک گرپڑا اور چل بسا۔ یہ صدمہ انگیز واقعہ آندھرا پردیش کے ضلع وجیانگر م میں جمعہ کی صبح پیش آیا۔

 راجم منڈل کے موگلی ولامہ میں اپنے گھر کے قریب واکنگ کے دوران سری ہری اچانک گرپڑا راہ گیروں نے فوری اسے راجم کے ہاسپٹل منتقل کیا جہاں وہ دوران علاج چل بسا۔

 اس نوجوان نے حال ہی میں انجینئرنگ کی تعلیم مکمل کی تھی اور وہ مسابقتی امتحان کی تیاری کررہا تھا۔ تلگوریاستوں میں پیش آئے سلسلہ وار واقعات میں یہ تازہ واقعہ ہے۔ جاریہ ماہ کے اوائیل میں ضلع کھمم میں جم میں ورزش کے بعد ایک 33 سالہ شخص، حرکت قلب بند ہوجانے سے قل بسا تھا۔