وزیر اعلیٰ وجے کا بڑا فیصلہ، اسکولوں اور مذہبی مقامات کے قریب 717 شراب کی دکانیں بند ہوں گی

چنئی: تمل ناڈو کے وزیر اعلیٰ سی جوزف وجے نے عوامی مفاد کو ترجیح دیتے ہوئے ریاست میں چل رہی 717 شراب کی خوردہ دکانوں کو آئندہ دو ہفتوں کے اندر بند کرنے کا حکم دیا ہے۔ یہ تمام دکانیں مذہبی مقامات، تعلیمی اداروں اور بس اسٹینڈز کے 500 میٹر کے دائرے میں واقع ہیں۔

وزیر اعلیٰ کے اس فیصلے کی اطلاع محکمہ اطلاعات و تعلقات عامہ، چنئی کی جانب سے جاری ایک بیان میں دی گئی

۔
تمل ناڈو اسٹیٹ مارکیٹنگ کارپوریشن (ٹی اے ایس ایم اے سی) اس وقت ریاست میں مجموعی طور پر 4,765 شراب کی خوردہ دکانیں چلا رہا ہے۔ وزیر اعلیٰ کی ہدایت پر کیے گئے خصوصی سروے میں معلوم ہوا کہ ان میں سے 717 دکانیں ایسی جگہوں پر واقع ہیں جہاں سے عام لوگوں اور طلبہ کو پریشانی ہورہی تھیں۔

بیان کے مطابق مذہبی مقامات کے قریب واقع 276 دکانیں، تعلیمی اداروں کے نزدیک 186 دکانیں اور بس اسٹینڈز کے آس پاس موجود 255 دکانیں بند کی جائیں گی۔ وزیر اعلیٰ نے انتظامیہ کو سخت ہدایات دی ہیں کہ ان تمام نشان زدہ دکانوں کو اگلے دو ہفتوں کے اندر مکمل طور پر بند کر دیا جائے۔