ذہنی دباؤ کے شکار طلبہ کو کونسلنگ کی سہولت، بورڈ آف انٹرمیڈیٹ کا ٹول فری نمبر جاری

حیدر آباد: امتحانات کی وجہ سے ذہنی تناؤ کا شکار طلبہ کو خصوصی کونسلنگ فراہم کرنے کا حکومت نے فیصلہ کیا۔

اس سلسلہ میں انٹرمیڈیٹ بورڈ کے عہدیداروں نے ایک ٹول فری نمبر قائم کیا ہے جو 24 گھنٹے کارکرد رہے گا۔ اس فیصلہ کے تناظر میں ہر ضلع ہسپتال میں براہ راست رابطہ کے لیے ڈاکٹرز دستیاب کرائے گئے ہیں۔

عہدیداروں نے سالانہ امتحانات کے دوران طلبہ پر دباؤ کم کرنے کے لئے اقدامات کئے ہیں۔ اس کے لئے 14416 اور 1800914416 ٹول فری نمبر جاری کے گئے ہیں۔

عہدیداروں نے کہا کہ ان نمبرات پر 24 گھنٹے کے دوران کسی بھی وقت فون کیا جاسکتا ہے اور ضروری مدد اور مشاورت کی جاسکتی ہے۔

اس کے علاوہ ہر ضلع کے ہسپتال میں ایک خصوصی ماہر نفسیات بھی دستیاب کرایا جا رہا ہے۔ حکام نے کہا کہ طلباء اور ان کے والدین ہسپتال جا کر ڈاکٹرس سے مشورہ کر سکتے ہیں۔