سی بی ایس ای ریویلیویشن پورٹل پر سائبر حملہ ناکام سروس دوبارہ بحال
بورڈ نے کہا کہ طلبہ سے ملنے والے فیڈ بیک کی بنیاد پر ہم نے اس پلیٹ فارم کو مزید بہتر بنایا ہے، جس میں سیشن کی وقت کی حد (ٹائم لیمٹ) کو بڑھانا بھی شامل ہے تاکہ پورا طریقۂ کار زیادہ آسان اور آرام دہ ہو سکے۔
نئی دہلی : مرکزی ثانوی تعلیمی بورڈ (سی بی ایس ای) نے منگل کو بتایا کہ اس کے ری ویلیویشین پورٹل پر شدید سائبر حملے کیے گئے، لیکن ویب سائٹ پر یہ سروس پھر سے شروع کر دی گئی ہے اور 16,000 سے زیادہ طلبہ اپنی درخواستیں مکمل کر چکے ہیں۔
سی بی ایس ای نے سوشل میڈیا پر جاری ایک بیان میں کہا کہ آج جب ہزاروں طلبہ سی بی ایس ای ری ویلیویشین پورٹل کا استعمال کر رہے تھے، تبھی کچھ شرارتی عناصر نے سائبر حملوں کی بوچھار کر کے خدمات کو ٹھپ کرنے کی کوشش کی۔ بورڈ نے آگے بتایا کہ اس حملے کے نتیجے میں صرف دو منٹ کے اندر پورٹل پر 15 لاکھ (1.5 ملین) ہٹس ریکارڈ کیے گئے۔ اس کے علاوہ پورٹل پر غیر مجاز طریقے سے فائلوں کو کھولنے کی بھی ایک لاکھ سے زیادہ کوششیں دیکھی گئیں۔
بورڈ نے کہا کہ طلبہ سے ملنے والے فیڈ بیک کی بنیاد پر ہم نے اس پلیٹ فارم کو مزید بہتر بنایا ہے، جس میں سیشن کی وقت کی حد (ٹائم لیمٹ) کو بڑھانا بھی شامل ہے تاکہ پورا طریقۂ کار زیادہ آسان اور آرام دہ ہو سکے۔
اس سے پہلے منگل کی صبح سی بی ایس ای نے 12 ویں جماعت کے بورڈ امتحان کے نتائج کے نمبروں کی تصدیق اور ری ویلیویشین کے لیے اپنا پورٹل کھولا تھا۔ بورڈ نے یہ قدم حال ہی میں شروع کیے گئے ڈیجیٹل مارکنگ سسٹم میں خرابیوں کو لے کر لاکھوں طلبہ سے شکایتیں ملنے کے بعد اٹھایا ہے۔
کئی بار کی تاخیر کے بعد بورڈ کا یہ پورٹل کھلا ہے۔ شروعات میں اسے طلبہ کے لیے 29 مئی کو ہی شروع کیا جانا تھا، لیکن سی بی ایس ای نے ایک شفاف اور غلطیوں سے پاک عمل کو یقینی بنانے کے لیے اسے یکم جون تک کے لیے ٹال دیا تھا۔
تعلیمی بورڈ کا یہ ری ویلیویشین پورٹل ‘آن اسکرین مارکنگ’ کے طریقۂ کار کو لے کر چل رہے تنازع کے درمیان کھولا گیا ہے۔ بورڈ نے ایک بیان میں واضح کیا کہ یہ سہولت صرف انہی طلبہ کے لیے دستیاب ہے جنہوں نے اپنی جانچی ہوئی کاپیوں کی اسکین شدہ کاپیاں حاصل کر لی ہیں۔
سی بی ایس ای نے کہا کہ امتحان کی کاپی کی ملی ہوئی اسکین کاپی میں نظر آنے والے مسائل کی تصدیق اور جوابات کے ری ویلیویشین کے لیے درخواست دینے کا پورٹل دو جون کو لائیو کر دیا گیا ہے۔ طلبہ اسکین کاپی میں کسی بھی قسم کی خرابی نظر آنے پر تصدیق کی سہولت کا فائدہ اٹھا سکتے ہیں اور اگر وہ اس تشخیص سے مطمئن نہیں ہیں، تو جوابات کے ری ویلیویشین کے لیے درخواست دے سکتے ہیں۔
شروع ہونے کے چند ہی گھنٹوں بعد سائبر حملے کا شکار بننے والا یہ پلیٹ فارم بورڈ کے سرکاری اعلان کے مطابق دو جون سے چھ جون (آدھی رات) تک کھلا رہنے کا امکان ہے۔
وزارت تعلیم نے اس آن اسکرین مارکنگ پورٹل تنازع کے درمیان سی بی ایس ای اور حیدرآباد کی کمپنی ‘کوئیمپٹ ایڈوٹیک’ کو دیے گئے ٹھیکے کے سلسلے میں ایک تفصیلی رپورٹ طلب کی ہے۔
