خواتین میں اندراماں ساڑیوں کی تقسیم کا آغاز، نیکلس روڈ پر چیف منسٹر کے ہاتھوں پروگرام کا افتتاح

حیدرآباد: وزیراعلیٰ تلنگانہ ریونت ریڈی نے آج ریاست بھر میں ایک کروڑاندرماں ساڑیوں کی تقسیم کا آغاز کیا اور کئی مستحق خواتین کو ساڑیاں حوالے کیں۔ سابق وزیر اعظم اندرا گاندھی کی جینتی کے موقع پروزیراعلیٰ نے حیدرآباد کے نیکلس روڈ پر ندرا گاندھی کے مجسمہ پر گلہائے عقیدت پیش کرنے کے بعد ساڑیوں کی پہلے مرحلہ کی تقسیم کا آغازکیا۔

حکومت کے مطابق، آج سے لے کر اگلے ماہ 9 تاریخ تک ریاست کے دیہی علاقوں میں ساڑیوں کی تقسیم کی جائے گی۔ دوسرے مرحلہ کے طور پر، یکم مارچ سے 8 مارچ تک شہری علاقوں میں ساڑیاں تقسیم کی جائیں گی۔

اس موقع پر خطاب کرتے ہوئے وزیر اعلیٰ ریونت ریڈی نے کہا کہ ملک میں سیاسی خلاء پیدا ہونے کے وقت اندرا گاندھی نے وزیر اعظم کی حیثیت سے ذمہ داریاں سنبھال کر ملک کو مضبوط قیادت فراہم کی۔ انہوں نے کہا کہ اندرا گاندھی نے امبیڈکر کے نظریات کی تکمیل کے لئے نمایاں خدمات انجام دیں۔

وزیراعلیٰ نے یاد دلایا کہ اندرا گاندھی نے بینکوں کے قومیانے کے ساتھ ساتھ ”زرعی اراضی سیلنگ ایکٹ” نافذ کرکے غریبوں میں اراضیات تقسیم کیں اور عام عوام کے لئے مکانات تعمیر کروائے۔ انہوں نے کہا کہ پاکستان کے ساتھ جنگ کے دوران اندرا گاندھی نے بے مثال حوصلے کے ساتھ ملک کی قیادت کی۔

ریونت ریڈی نے مزید کہا کہ موجودہ حکومت اندرماں سے حاصل ہونے والی تحریک کے ساتھ آگے بڑھ رہی ہے اور خواتین کے بااختیار بنانے کے لئے کئی اقدامات کررہی ہے۔

اس تقریب میں نائب وزیر اعلیٰ بھٹی وکرامارکا، وزراء، ارکان اسمبلی، سرکاری مشیران، کارپوریشن چیئرمین اور اعلیٰ حکام شریک ہوئے۔