سابق عالمی شہرت یافتہ نشانے باز جسپال رانا کا انتقال

نئی دہلی: ہندوستان کے سابق ممتاز نشانے باز اور قومی پستول شوٹنگ ٹیم کے ہائی پرفارمنس کوچ جسپال رانا کا دل کا دورہ پڑنے سے انتقال ہو گیا۔ وہ 49 برس کے تھے۔ وزیر اعظم نریندر مودی نے ان کے انتقال پر گہرے رنج و غم کا اظہار کرتے ہوئے اسے ہندوستانی کھیلوں کے لیے بڑا نقصان قرار دیا ہے۔

نیشنل رائفل ایسوسی ایشن آف انڈیا (این آر اے آئی) نے جسپال رانا کے انتقال کی تصدیق کی ہے۔ انہیں سال 2020 میں کوچنگ کے شعبے کے اعلیٰ ترین اعزاز درو ناچاریہ ایوارڈ سے نوازا گیا تھا۔

اطلاعات کے مطابق جرمنی کے شہر میونخ میں منعقدہ آئی ایس ایس ایف ورلڈ کپ سے واپسی کے دوران پرواز میں ان کی طبیعت اچانک خراب ہو گئی تھی۔ دہلی پہنچنے کے بعد انہیں ساکیت کے میکس اسپتال میں داخل کرایا گیا، جہاں دورانِ علاج ان کا انتقال ہو گیا۔

جسپال رانا اس وقت ہندوستانی پستول شوٹرز کے ہائی پرفارمنس کوچ کے طور پر خدمات انجام دے رہے تھے۔ ان کی کوچنگ میں ہندوستانی شوٹنگ ٹیم نے نمایاں کامیابیاں حاصل کیں۔ معروف نشانے باز منو بھاکر بھی ان کی شاگرد رہی ہیں، جنہوں نے ان کی رہنمائی میں پیرس اولمپکس 2024 میں دو تمغے جیتے تھے۔

اپنے کامیاب اور شاندار شوٹنگ کیریئر کے بعد جسپال رانا نے کوچ کی حیثیت سے نوجوان کھلاڑیوں کی تربیت میں اہم کردار ادا کیا اور ہندوستانی شوٹنگ کو نئی بلندیوں تک پہنچانے میں نمایاں خدمات انجام دیں۔

وزیر اعظم نریندر مودی نے سوشل میڈیا پلیٹ فارم ایکس پر اپنے تعزیتی پیغام میں کہا کہ جسپال رانا نے اپنی غیر معمولی کامیابیوں سے ملک کا نام روشن کیا اور ایک مینٹر کے طور پر نوجوان کھلاڑیوں کی تربیت و رہنمائی میں گراں قدر خدمات انجام دیں۔ انہوں نے کہا کہ کھیل کے میدان میں ان کی خدمات اور نظم و ضبط کے لیے انہیں ہمیشہ یاد رکھا جائے گا۔

وزیر اعظم نے مرحوم کے اہل خانہ، دوستوں اور کھیلوں کی برادری سے تعزیت کا اظہار کرتے ہوئے ان کی روح کے لیے دعا کی۔