حیدرآباد: فارنسک لیب میں آتشزدگی۔شواہد کے ضائع ہونے کی خبریں بے بنیاد: ڈائریکٹر شیکھا گوئل

حیدرآباد: حیدرآباد کے علاقہ نامپلی میں واقع اسٹیٹ فارنسک سائنس لیبارٹری میں پیش آنے والے آتشزدگی کے واقعہ کے بعد سوشل میڈیا پر گردش کرنے والی منفی خبروں کی سائبر سیکیورٹی ڈائریکٹر شیکھا گوئل نے سختی سے تردید کی ہے۔ انہوں نے واضح کیا کہ اہم معاملات کے شواہد جل جانے کے پروپگنڈہ میں کوئی سچائی نہیں ہے۔

انہوں نے بتایا کہ 2015 کے ایک اے سی بی کیس سے متعلق 16 اشیاء کا معائنہ بہت پہلے مکمل کر لیا گیا تھا اور وہ تمام شواہد 2021 میں ہی عدالت کے حوالے کر دیئے گئے تھے۔ اس وقت لیب میں اس کیس سے متعلق کوئی ریکارڈ یا اشیاء موجود نہیں تھیں۔

ڈائریکٹر نے بتایا کہ عملہ کی چوکسی کی وجہ سے ایک بڑا حادثہ ٹل گیا اور دوپہر 1.30بجے تک آگ پر مکمل قابو پا لیا گیا تھا۔ انہوں نے مزید کہا کہ جلد ہی لیب کا فائر آڈٹ کروایا جائے گا جس کے بعد معمول کے مطابق کام کا آغاز کر دیا جائے گا۔
شیکھا گوئل نے عوام اور میڈیا سے اپیل کی ہے کہ وہ اس حساس معاملہ پر بے بنیاد افواہوں پر کان نہ دھریں اور صرف تصدیق شدہ معلومات پر بھروسہ کریں۔