ہندوستانی خاتون فٹ بال ٹیم کی کپتان گریس ڈنگمی کا بین الاقوامی فٹ بال سے ریٹائرمنٹ کا اعلان

نئی دہلی: ہندوستانی خاتون فٹ بال ٹیم کی مایہ ناز کھلاڑی اور کپتان گریس ڈنگمی نے بین الاقوامی فٹ بال کو الوداع کہہ دیا ہے۔ انہوں نے یہ فیصلہ سیف ویمنز چیمپئن شپ 2026ء کے فائنل میں بنگلہ دیش کے خلاف ہندوستان کی شاندار فتح کے بعد کیا۔

30 سالہ فٹ بالر نے اپنے کیریئر کا اختتام تیسرا سیف چیمپئن شپ ٹائٹل جیت کر اور بطور کپتان ٹرافی اٹھا کر ایک یادگار انداز میں کیا۔فائنل میچ میں اگرچہ گریس نے شروعاتی الیون میں حصہ نہیں لیا تھا، لیکن وہ بطور متبادل کھلاڑی میدان میں اتریں اور بعد میں انہیں ٹیم کی کپتانی سونپی گئی، جس نے ان کی الوداعی تقریب کو مزید یادگار بنا دیا۔

میچ کے بعد اپنے جذبات کا اظہار کرتے ہوئے گریس نے کہا”کھیل کے اختتام پر ماحول انتہائی جذباتی تھا، اور جس چیز سے آپ کو سب سے زیادہ محبت ہو، اسے الوداع کہنا واقعی بہت مشکل ہوتا ہے۔”گریس ڈنگمی کا بین الاقوامی فٹ بال سفر کامیابیوں سے بھرپور رہا ہے۔

انہوں نے 2013ء میں اپنے سینئر بین الاقوامی کیریئر کا آغاز کیا اورہندوستان کے لیے 95 میچز کھیلے۔ تقریباً 15 سال کے طویل عرصے میں انہوں نے خود کو ٹیم کی سب سے اہم فارورڈ کھلاڑی کے طور پر منوایا اور ہندوستان کے لیے 24 گول کیے۔

وہ 2016ء، 2019ء اور 2026ء میں سیف چیمپئن شپ جیتنے والی ہندوستانی ٹیموں کا اہم حصہ رہیں۔ اس کے علاوہ انہوں نے 2016ء اور 2019ء کے ساؤتھ ایشین گیمز میں گولڈ میڈل جیتنے میں بھی کلیدی کردار ادا کیا۔