نوی ممبئی ہوائی اڈے سے بین الاقوامی کارگو پروازوں کا آغاز

نوی ممبئی :   نوی ممبئی بین الاقوامی ہوائی اڈے سے بین الاقوامی کارگو پروازوں کا باضابطہ آغاز ہو گیا ہے۔اس ہوائی اڈے سے پہلی مخصوص بین الاقوامی کارگو پرواز گزشتہ 2 اگست کو شارجہ کے لیے روانہ ہوئی۔

ہوائی اڈے کی آپریٹنگ کمپنی اڈانی ایئرپورٹس نے منگل کو جاری ایک پریس ریلیز میں کہا کہ انڈیگو کارگو کے ذریعے چلائی جانے والی اس پہلی کارگو پرواز نے ایک اہم سنگ میل عبور کیا ہے، جس سے ممبئی میٹروپولیٹن خطے اور مغربی ہندوستان کے لیے ایک نئے فضائی کارگو گیٹ وے کے طور پر ہوائی اڈے کا کردار مزید مضبوط ہوا ہے۔

اس پرواز کے ذریعے تقریباً 20 ٹن کارگو روانہ کیا گیا، جس میں عمومی سامان اور جلد خراب ہونے والی اشیا شامل تھیں۔ اس کھیپ میں ممبئی اور احمد آباد سے موصول ہونے والا برانڈڈ ٹرانسفر کارگو بھی شامل تھا، جسے برانڈڈ ٹرکنگ نظام کے ذریعے نوی ممبئی ہوائی اڈے تک پہنچایا گیا۔

پریس ریلیز میں کہا گیا ہے کہ یہ کارروائی نوی ممبئی ہوائی اڈے کے مربوط کارگو ایکو سسٹم کو مضبوط بنانے کی سمت ایک اہم قدم ہے۔ اس نظام کو گھریلو، بین الاقوامی، ایکسپریس اور ٹرانزٹ کارگو کی نقل و حمل کی ضروریات کو پورا کرنے کے لیے تیار کیا گیا ہے۔ ہوائی اڈے پر جلد خراب ہونے والی اشیا، دواسازی کی مصنوعات، قیمتی سامان، خطرناک مواد اور دیگر خصوصی نوعیت کے کارگو کی دیکھ بھال کے لیے جدید سہولیات بھی دستیاب ہیں۔