اعظم خان کے نام کی تختی توڑنے پر رامپور میں مسلم قائد گرفتار

رامپور: آل انڈیا مسلم فیڈریشن کے صدر فرحت علی خان کو باپو مال میں سماج وادی پارٹی (ایس پی) قائد محمد اعظم خان اور سابق چیف منسٹر اترپردیش اکھلیش یادو کے ناموں کی تختی توڑنے پر گرفتار کرلیا گیا۔

فرحت علی خان نے اتوار کے دن تختی توڑنے کے لئے ہتھوڑی استعمال کی تھی۔ ان کا کہنا ہے کہ اعظم خان ک ووٹ ڈالنے کا حق نہیں رہا۔ انتظامیہ کو چاہئے کہ وہ اعظم خان کے نام کی تمام تختیاں ہٹادے۔

اگر ایسا نہ کیا گیا تو وہ خود انہیں توڑدیں گے۔ فرحت علی خان نے کہا کہ جس شخص نے لوگوں کے گھر توڑے وہ اس ملک میں رہنے کا تک حقدار نہیں۔ صدام اور طالبان کا اقتدار ختم ہوا۔ اب صرف قوم پرستی کی حکمرانی ہے۔

صرف نیشنلسٹ آئیڈیالوجی والے مسلمان‘ ہندوستان میں رہیں گے۔ مجھ میں ہمت ہے جو میں نے تختی توڑکر دکھادی ہے۔

ایڈیشنل سپرنٹنڈنٹ پولیس سنسار سنگھ نے کہا کہ فرحت علی خان کے خلاف کیس درج کیا گیا اور گرفتاری عمل میں آئی۔ رامپور کے باپو مال کا افتتاح اُس وقت کے چیف مسٹر اکھلیش یادو نے کیا تھا۔ تختی پر ان کا اور اعظم خان کا نام لکھا تھا جسے فرحت علی خان نے ہتھوڑی سے توڑدیا۔