بھارتی طلبہ کو فائدہ، تعلیمی دستاویزات کی سرحد پار تصدیق کے لیے نیا معاہدہ
اس سے دھوکہ دہی کا خطرہ ختم ہو جاتا ہے، ڈیٹا کی مکمل راز داری یقینی ہوتی ہے اور درخواست کی کارروائی میں لگنے والا وقت کافی حد تک کم ہو جاتا ہے۔
نئی دہلی : الیکٹرانکس اور انفارمیشن ٹیکنالوجی کی وزارت کے تحت نیشنل ای گورننس ڈویژن (این ای جی ڈی) نے ہندستان میں آسٹریلین ایجوکیشن ریپریزنٹیٹوز کی ایسوسی ایشن (اے اے ای آر آئی) کے ساتھ مل کر ‘اے اے ای آر آئی-ویریفائی’ ڈیجیٹل پلیٹ فارم کا آغاز کیا ہے۔
وزارت کی ہفتے کے روز جاری کردہ ایک پریس ریلیز کے مطابق، ہندستان کے – ڈیجی لاکر پلیٹ فارم کے ساتھ براہِ راست منسلک یہ ‘اے اے ای آر آئی-ویریفائی’ پلیٹ فارم آسٹریلوی یونیورسٹیوں میں درخواست دینے والے طلباء کے لیے تعلیمی، شناختی اور مالیاتی دستاویزات کی محفوظ، کاغذ کے بغیر اور رضامندی پر مبنی تصدیق کو ممکن بنائے گا۔
اس پلیٹ فارم کا افتتاح جمعہ کے روز دارالحکومت میں منعقدہ اے اے ای آر آئی کی سالانہ کانفرنس کے دوران کیا گیا۔
پریس ریلیز میں کہا گیا ہے کہ ‘اے اے ای آر آئی ویریفائی’ ایک سورس-ویریفائیڈ تصدیقی پلیٹ فارم ہے جسے آسٹریلوی اعلیٰ تعلیمی اداروں کے لیے طالب علموں کی اسناد کی جانچ کو آسان اور منظم بنانے کے لیے ڈیزائن کیا گیا ہے۔
اس سے عمل میں تیزی آئے گی۔ اس کے تحت تصدیق کے عمل کو دو حکمتِ عملی کے مراحل میں تقسیم کیا گیا ہے۔ پہلے مرحلے میں طالب علم کی تصدیق – یونیورسٹی میں درخواست دینے کا عمل شروع ہونے سے پہلے آسانی سے مکمل کی جاتی ہے۔ دوسرے مرحلے میں اسپانسر کی جانچ کا عمل مالیاتی اصلیت کی تصدیق کے لیے طالب علم کو داخلے کی پیشکش حاصل ہونے کے فوراً بعد شروع کیا جاتا ہے۔
طالب علم کی واضح رضامندی کے ساتھ، ڈیجی لاکر آسٹریلوی یونیورسٹیوں کو اصل جاری کنندہ حکام سے ڈیجیٹل طور پر دستخط شدہ ریکارڈز تک براہِ راست رسائی فراہم کرے گا۔ اس سے دھوکہ دہی کا خطرہ ختم ہو جاتا ہے، ڈیٹا کی مکمل راز داری یقینی ہوتی ہے اور درخواست کی کارروائی میں لگنے والا وقت کافی حد تک کم ہو جاتا ہے۔
نیشنل ای گورننس ڈویژن کے ڈائریکٹر جے ایل گپتا نے کہا، "یہ تعاون ظاہر کرتا ہے کہ ہندستان کا ڈیجیٹل پبلک انفراسٹرکچر (ڈی پی آئی) کس طرح حقیقی عالمی چیلنجوں کا حل نکال رہا ہے۔ ڈیجی لاکر کو اے اے ای آر آئی ویریفائی کے ساتھ جوڑ کر، ہم ایک محفوظ، کاغذ کے بغیر اور قابلِ اعتماد ڈھانچہ فراہم کر رہے ہیں جو ہمارے طلباء کے لیے تمام تر بین الاقوامی داخلے کے عمل کو آسان بناتا ہے۔”
ڈیجیٹل انڈیا پروگرام کے تحت تیار کردہ ڈیجی لاکر فی الوقت 72 کروڑ سے زائد رجسٹرڈ صارفین کو خدمات فراہم کر رہا ہے اور مجاز اداروں کے ذریعے جاری کردہ ڈیجیٹل طور پر دستخط شدہ دستاویزات کے محفوظ اجراء، ذخیرہ اندوزی، شیئرنگ اور حقیقی وقت میں تصدیق کو ممکن بناتا ہے۔ یہ شراکت داری ہندستان کی گھریلو ڈیجیٹل کامیابی کو عالمی تعلیمی ایکو سسٹم میں وسعت دینے کی سمت میں ایک اہم قدم ہے۔
